Tutonginany ya Kurutu!

¹ Dirijek dia Yehova dirijekining program wa mijikit ya uteokras mulong wa kukwatikesh nswir jetu ja muspiritu. Kujikitish kwetu kukat kutubachik kwisakin sens yom yawonsu yirijekinau, mud maweny ma kalam mwin kwendangan, yikunguril, ni mijikit yikwau ya pakampwil yitenchikinau mu chikumangen. (Mat. 5:⁠3) Pakwez, amwing aburedining yivud mu yitenchik yiney ya muspiritu mulong wa milong yikwau yatongidinau kusal. Ov chom ik tukutwisha kusal chakwel kwipuk chinech? Ov chom ik tukutwisha kusal chakwel kuman anch mijikit yakad kwikal ya uteokras yipachikinap mu ‘yom yipandikena usey’?​—⁠Filp. 1:⁠10.

² Kutongin Nich Manangu Kudi kwa Dishimen: Jinswir 21:5 jitukasikeshin anch: “Yitongijok ya mwin mushiku ya kusal yom yishikin ku kupit, pakwez kudi ndiy ukusala yaswa ukushik ku kuburen.” Chakwel “kupit” muspiritu, tufanyidin kutongin nich mushiku, ni kuvurik mijikit ya uteokras yatenchikinau. Turijekany mijikit yetu pa chisu chakad kutwish kutukangesh kwikal ndond kutukutwisha kutambul yiyukish yivud ya muspiritu. Anch twatenchik maumau yom tusotina kusal, pakad kutongin yitenchik ya uteokras ya kurutu, tukez kaman chakin mar ma “kuburen” muspiritu.

³ Kangal Twaburen! Etu awonsu tukakutonginang ya kusal machuku ma kurutu, yikala konje, maweny ma kwisak, kuya ni kutal anamakwetu, ap yom yikwau. Kurutu kwa kusal yitutongidina ap kuyishiken, tushinshikinany bil program wa mijikit ya muspiritu. Anch twaman anch kalam’a sirkwit ukwez ap anch kukwikal chikunguril mu machuku ma ngond ma yitutongidina kusal, tusalany usu nakash wa kwirijekiril chakwel twisakina yitenchik yiney. Akat kutwijikishang kurutu kwa chisu yinship yijim. Pakwez amakurump a chikumangen chetu akutwish kutwijikish yatenchikinau kusal mu chikumangen chetu.

⁴ Anch twasadil kubabal ni kutongin ya kurutu mulong wa yom yipandikena usey, tukez kwikal ‘izwila mabuj ma kutentam, . . . ku uyaj ni kushiman kwa Nzamb.”​—⁠Filp. 1:⁠11.