Ov mulong wak kutongin ya kurutu?
1 Etu awonsu tukat kutonginang yitukusala machuku ma kurutu. Antu akweta ruchingej ra panap pansh achingedil kushakam chikupu mu mangand masu matentamina ma Nzamb. Pakwez kudi yipwichik yikutwisha kudiosh ruchingej riner mu muchim wetu. Chitin komb kusal usu wa kashinsh chakwel kudandamen kutungin mwom wetu pa yisakin ya Want ni kulik kwikal azuwodilau nich maku ma mujimbu wa mbij.—1 Yoh. 2:15-17.
2 Mangand makutwishap kutesh yisotilau antu akwatina nich makas maad yom ya muspiritu. (1 Kor. 2:14) Pachidiau antu akwau kurishin mulong wa kwikal ni katumb, dikand, ap mapit, tukat kukimb nich mushiku yipau ya muspiritu. (Mat. 6:19-21) Anch twapakish kurijek yitongijok yetu chakwel yambatana nich mutapu wa mangand wa kuman machuku ma kurutu, ov tukez kutwish kuwanyish rutong retu ra muspiritu? Yom ya mangand yikutwish kwizul mu michim yetu. Ov mutapu ik tukutwisha kwipuk chinech?
3 “Mudjalany Mwant Yesu Kristu”: Njil yimwing ya kumekesh anch tukat kutungin machuku metu ma kurutu pa yisakin ya Want yidi kushinshikin misamb yetu. Ov tukat kwisambin chisu ni chisu yom ya ku mujimbu ni yisakin yamwamu ya mangand? Anch mwamu chidia, tufanyidin kushinshikin anch muchim wetu ukat kushadish kutek yitongijok ku yom yipandakena usey ya muspiritu. Tukutwish kwikal nich kuswir kwa kukasikeshin nakash ‘kumudjal Mwant Yesu Kristu kupandakanamu kutenchik kurutu mulong wa maku ma mujimbu.’—Rom 13:14.
4 Ansand akutwish ‘kumudjal Kristu’ nich kutongin chisu cha kwandam mu mudimu wa chisu chawonsu. Nsand umwing wadinga ni kusot kwikal chibol wa rawonsu, wapamina mu chinshakuru chimwing mudinga chaku cha kwel anch ansand afanyidin bil kwikal ni nfalang jivud ja kwikwash nich. Chawiy lel, wasambisha kusal wingend-a-mushing nakash mu chilik cha kusambish kusu kuyang ku yikumangan ni kulejan wakad kutekaku muchim. Pasambishay kuchingejin mazu ma Yesu madia mu Mateu 6:33 ni kutongin mudimu wadingay ni kusal pakad kubang, ndiy wakwata chiyul cha kusal mudimu wa chisu chawonsu, wasambisha kusal mudimu wa chisu chawonsu. Katat, nich kom katok, ukat kumusadil Yehova, mud kamu mwalonday, ‘nich usu wend wawonsu.’
5 Baibel ulondil anch chidi cha manangu kutongin ya kurutu. (Jinsw. 21:5) Etu awonsu tuwapidil kusal mwamu nich kutongin kusal rusot ra Nzamb.—Efe. 5:15-17.