Tudi Afundishinau Kud Yehova
1 Nich umutakel wa Nzamb program wa mangand mawonsu wa mafundish ukat kusal mwi ngand 233. Kwikil chom ap chimwing chikupana mangand chikutwisha kwisikan nich. Yehova, Mulej wetu Mujim, ukat kutufundish mulong wa kuwap kwetu kwa katat ni mulong wa mwom wa chikupu.—Isa. 30:20, NW; Isa. 48:17, NW.
2 Mashikol ma Mafundish ma Winzamb: Tushinshikinany mashikol mapanina mafundish katat mulong wa kuwap kwa antu a Yehova. Shikol ya Mudimu ya Uteokras, akat kuyisalang rubing ni rubing mu yikumangen 87000, yikat kufundishang mamiliyon ma antwarubil a Want mutapu wa kwikal antwarubil a rusangu ruwamp akweta mabuj. Ov wifundishin kal ku shikol yiney? Ov udi pakach pa tunan twa akadivar ni anambaz ilejina Shikol ya Mudimu wa Chibol mu ambing aad? Chitwishikin anch kukepish kwa asaa ayitiningau ayibol a rawonsu kukuyitwishish antwarubil avud kusal mudimu winou ni kuwanyish yitinau mulong wa kwilej shikol yiney. Shikol ya Mafundish ma Mudimu, yikatau kwilej mu angond aad mu jindim jijim jilondiningau mu mangand, yiyiwanyishining amakurump ni ankwash’a midimu achidia ambalak kwikal ni yisend yijim ya uteokras. Chisu ni chisu, amakurump awonsu ni ankwash’a midimu awonsu akat kutambulang mafundish mafanyidina ku Shikol ya Mudimu wa Want.
3 Ku Santre wa mafundish wa Sosait udia mu New York, ku Patterson, kwikungidin shikol jisatu ja pakampwil jikata kupan diyiy dijim dia uteokras. Mafundish ma angond atan ku Gilead, Shikol ya chibaibel ya Sosait Watchtower, makat kurijekang in kusal mudimu mulong wa kusal mudimu wa umishoner mwi ngand ja wingez. Yid ya Komite wa Mutiy ya mu mangand mawonsu yikat kwilejang mu chirung cha angond aad dirijek dia mitiy. Mu Ndol-Mem 1999, asambishin malejan makwau masu ma atulam in kwendangan nich kalas kamwing ka in kwilej 48 a mu États-Unis ni mu Canada. Atushalapol a Yehova awonsu atambwiling ukwash wa diyiy dipaniningay Yehova kusutin mashikol minam kushalijan.
4 Ov Mulong wak Utufundishinau? Chid chimwing cha chisak chitakedila walonda anch: “Program wa katat wa mafundish ufanyidin kuyitwishish antu a Yehova kushiken kukul kwa kashinsh kwisambidinau mu Jinswir 1:1-4.” Yehova adandamena kumwinkish muntu ni muntu pakach petu “rudim ra antu afundishinau.” —Isa. 50:4, NW.