Shikol Ya Diyiy Dia Mudimu—Chis Chijim Chazurikina Cha Mudimu Ujim
1 Yehova walonda kusutil muprofet Jeremiy anch: “Am nikez kubudish pakach pa [antwam] atufung akeza kuyidish; ni awiy kakez kovap kand wom, ap kakezap kand kuzal, ni kukezap kuburen ap umwing.” (Jer. 23:4, NW) Mudimu winou wa ukafung usadikin nlel unou pakach pa antu a michid yawonsu. Mudimu winou ausadin kud makum ma tunan twa amakurump a yikumangen. Chikwau kand, ansangarum avud mud maum ipanina kwa kwisotil ayinau mu mudimu wa Yehova. (Kus. 110:3) Chakin kamu akadivar inay in kwikepish adi chiyukish ku yikumangen ya antu a Nzamb! Mutapu udandamedina mudimu wa kukumangej wa muspiritu, kuchidi kand maswir ma amakundj ayifuvu in kwipan ayinau mulong wa kuyisadin akadivar nau.
2 Ditenchik diwamp dia kuyiy amakurump ni ankwash a mudimu ajich mulong wa yisend yivud yiwejidinaku yidi Shikol ya Diyiy dia Mudimu. Kudiosh kamu pasambisha shikol yiney mu muvu wa 1987, kwasadikin kal tulas 999 ni ansand 22000 ni kusut kudiokal mu jingand piswimp 140 atambwila kal diyiy dined. Shikol yiney yamekana kwikal kud akadivar inay, ‘chis chijim chazurikina cha mudimu ujim.’—1 Kor. 16:9.
3 Rutong ra Shikol: Rutong rijim ra Shikol ya Diyiy dia Mudimu ridi ra kuyiy ni kuyiwanyish amakundj ayifuvu mulong wa kusend yisend ndond yin yawonsu yikutwisha kwikal nich maswir mu dirijek. Shikol yikat kukudish ukaliweny wau wa kutakel mu mudimu wa kulejan rusangu ruwamp, kusal mudimu wa kulam amikoku, ni kulejan mu yikumangen. Kupwish kwa shikol, ansand amwing akat kuyitum mud ayibol apakampwil ap mud atulam in kwendangan mu jingand jishichau ap ja wingendj. Akwau akat kuyitum kusadil mu yikumangen ya pol pau ap mwi ndond mudia kuswir kujim mukach mwa teritwar wa mutiy.
4 Mwi mbing chinan ja malejan, ansand akat kusambish kwilej Bibil chipandikena. Akat kushinshikin nakash malejan mavud ma Bibil pamwing ni yisend ya ukafung ni mbil ja kupwish nich milong mu mashakamin ma Ukristu. Akat kwilej kand yilejenay Bibil piur pa milong ya umutakel, ya kurumburish ni ya kurijek. Akat kutambul diyiy dia pakampwil mu kulond kwa patok ni akat kuyikwash muntu ni muntu panrend chakwel kuwejinaku kukul kwau kwa muspiritu.
5 Yitinau: Yoviken kamu anch, yitinau pa kuya ku shikol yidi ya piur nakash. Ipanina afanyidin kwikal antu asadila kal mud amakurump ap ankwash’a mudimu mivu yaad yilondulijadina. Awonsu afanyidin kwikal ajich akweta mivu pakach pa 23 ni 50. Ipanina afanyidin kwijik kutang, kufund, ni kulond nawamp rudim ritakedinau nich shikol, ni afanyidin kwikal akash ku mujimbu, akad kwikal nich chisend cha pakampwil ap yakudia ya pakampwil. Chakusambish antu adia mu mudimu wa uchibol wa rawonsu.
6 Antu ipanina ayinau afanyidin kwirijek ni kusadil kwawonsu kuyiswiridinau. Chinech chitin kwikal nich spiritu mud wa muprofet Isay, wipana amwinend nich musangar kusal mudimu wa pakampwil, walond anch: “Yam unou! Ntuma.” (Is. 6:8) Wamekesha kand kwikepish mu mwom wend. Antu ipanina ayinau mulong wa Shikol ya Diyiy dia Mudimu afanyidin kwikal abachikinau nich rukat mulong wa akadivar nau ni rusot ra kuyisadil pa ndond pa kusot ntumb yau ap kwikal ni ndond ya pakampwil. Kupwa kwa kutambul diyiy diwamp mud dined, ansand inay ayichingejin asadil yom yilejinau mulong wa kuyikwash akwau.—Lu. 12:48.
7 Yiyukish: Mwi mbing chinan ja diyiy dipandakena, ansand akat ‘kwidish nich mazu ma ritiy ni malejan mawamp.’ (1 Tim. 4:6) Chinech chikat kuyiwanyish chakwel kuyikwash ni kuyikasikesh akwau mu yikumangen yau ni mu minyimuku yiyituminau. Mu jindond jivud mwayituminau ansand apwishina Shikol ya Diyiy dia Mudimu, mudimu wa chingand watandurikin; akasikeshin mudimu wa uchibol, nakash kamu pakach pa ansand; ni kuyisanger nakash pakampwil antu asu avud abombakena nau antu a Nzamb.
8 Ov, udi mukurump ap nkwash’a mudimu mujich ukweta mivu pakach pa 23 ni 50? Ov, mulong wak kulik kutonginap anch ukutwish kwipan mulong wa kuya ku Shikol ya Diyiy dia Mudimu? Ov, udi nsangarum mukadivar witekidina ntong ja dikez mu mudimu wa Yehova? Ov, mulong wak kulik kupipesh mwom wey ni kulik kuzuwol chakwel kutwish kwandam mu chin ‘chis chijim chazurikina cha mudimu ujim’? Chikutwish kukuletin musangar nakash ni mazang. Chakin kamu, Shikol ya Diyiy dia Mudimu ayitenchikin kwikal chiyukish chidiap kusu kwau kud ansand a shikol pakwez ku yikumangen ya antu a Nzamb pa mangand mawonsu.
[Caption on page 3]
[Picture on page 3]
Mutapu Wayukinau Kusutil ku Diyiy
“Diyiy diawejidin mudimu wam ni ukaliweny wam wa kusal mudimu wa ukafung nich manangu,ni kusadil Bibil.”
“Shikol yangikishin kashinsh nakash mu kutakel kwa yisend yam kushalijan mu chikumangen.”
“Yaswimpin chipandakena mwikadil win wawonsu wa mwom wam,pamwing ni mutapu nadia ni kutong piur pa uteokras ni pa dirijek dia Nzamb.”
“Diyiy natambwila diankwashin kuwanyish maswir ma kwipan kwam mulong wa kusadil kwi ndond kudia kuswir.”