Ditenchik Disu dia Kuchirikin Program wa Chikumangan cha Munyimuku ni cha Pakampwil

Mutapu madandamedina mangand ma Satan mu kuyip ni mu kuyip nakash, Yehova utukasikeshin “chakwel tudjibul yom yiyimp ni kulik yom ya mangand, ni kushakam ni michim yitudila ni yitentamina ni yiwapila [kwipan kud Nzamb] mu mangand minam.” (Tit. 2:12) Pa yitenchik yisadinay kusutil kud “kashalapol ushishamena ni kubabal” mudi program wa pa muvu wa chikumangan cha munyimuku ni wa chikumangan cha pakampwil cha dichuku dimwing. (Mat. 24:45) Chakin kamu kukumangan kwinoku kwa muspiritu kutukasikeshin!

Mulong wa kutukwash kulam ni kusadil malejan matwateshina, ditenchik disu dia kuchirikin program wa yikumangan yiney akudisadil mu muvu wa mudimu wa 2005. Paj wa 5-6 wa wenjil winou makwet mitu ya milong yilangwishina maku ma yikwikala kurutu ku program wa yikumangan ni yipul ya kuchirikin ya program wa chikumangan ni chikumangan. Yikumangen yikushinshikin rusangu riner ku Chikumangan cha Mudimu chisu chikemp kurutu kwa kukumangan ku yikumangan yau ni chisu chikemp kupwa kwa kudiokalaku. Chikusadika mutapu ik?

Rubing rumwing ap jaad kurutu chikumangen chiya ku chikumangan cha munyimuku, diskur dia aminit dikum dimedina pa mutu wa mulong “Program Musu wa Chikumangan cha Munyimuku” akudisal ku Chikumangan cha Mudimu mulong wa kukasikeshin maku ma program wa kurutu. Mwin kulond ukwasin kand ku yipul ya dichirikin ni kuyikasikesh awonsu kufund yom ya usey mu kwirijek mulong wa kuchirikin kukulondulaku mbing jikemp kupwa kwa chikumangan.

Mwi mbing jikemp kupwa kwa chikumangan, kukwikal dichirikin dia aminit 15 dia program wa dichuku dia kusambish dia chikumangan ku Chikumangan cha Mudimu. Rubing rambakedinap, kukwikal aminit 15 a kuchirikin program wa dichuku dia kaad. Yipul ya dichirikin yirijekinau mwi wenjil winou yawiy yikwikal dishin dia minsamb yiney. Dichirikin difanyidin kwasin pa usey wa kusadil malejan. Amakurump akutwish kurijek chakwel kwiswimpish, ap kudiosh, ap kutenchikiril yikunku yikwau ya program wa Chikumangan cha Mudimu chakwel kwandjikaku yikunku yiney ya dichirikin.

Ditenchik diawiy dimwing dikusadilau kand nich program wa chikumangan cha pakampwil cha dichuku dimwing, pakwez kukwikal ching kusu chikunku chimwing cha aminit 15 chakwel kuchirikin program mwawonsu. Etu awonsu tufanyidin kulam wenjil winou nawamp ni kumusadil mulong tutaninamu sens ku malejan mawamp matwinkishinau kud Yehova.​—⁠Is. 48:​17, 18.