Ov ukuham?

Anch chakul ku chipul chinech chidi anch mwawiy, kudi yom yivud yiufanyidinany kusal ey ni antu akwau. Anch walondul jinzau ja dishin jilejenau ej, ukushakam swa mu chikumangen chey chisu.

(1) Anch wijik kamu ndond yiukuhamina, kalam’a ujindj wa chikumangen chiudiamu ukutwish kutambul adres wa Chot cha Want cha chikumangen chey chisu. Anch washik ndond yiuyila, kimb kapamp kamwing ndond kudia Chot cha Want ni kwijik yisu yikatau kukumangan. Anch yikumangen yivud yisadidil Chot cha Want chimwing, yipula amakurump akuleja teritwar wa chikumangen muushicha. Kangal walab mulong wa kuya ni kukumangan ni kwijikijan ni amakurump.

(2) Kalam’a Ujindj wa chikumangen chey cha kusambish ni wa chikumangen chey chisu akusadil pamwing mulong wa kutum fish wey ni mafish ma dijuku diey. Akuyitumin kand amakurump a chikumangen chey chisu mukand wa kuyijikish kushik kwey. (Tal mukand wa Kalol 1, 1999 ku makolej mawonsu ma amakurump ni Yakul ku Yipul Yen ya Mudimu Wetu wa Want wa Kafunfut 1991.) Komite wa Mudimu wa Chikumangen ufanyidin kumwijikish ntakel wa dilejan dia buku ya kushik kwey chakwel amanijana ney ni kukukwash kwijik ndond yey yisu ya dilejan dia buku.​—⁠Rom 15:⁠7.

(3) Antwarubil awonsu mu chikumangen chey chisu akutwish kwikal ni chikunku cha musangar cha kuwejinaku​—⁠kwijikijan ney ni kukwak nawamp. (Isikej 3 Yohan 8.) Chakin, chinech chirumburikin anch ufanyidin kwikal ku yikumangan, mu mutapu winou ukutwish kusanger kukasikeshijan ni kutungijan ni akadivar nau anambaz.

(4) Ufanyidinap kuchingel kushik ni chisu chikupwa mudimu wawonsu wa kuham chad lel usambisha kubudikin mu mudimu wa kulejan pamwing ni chikumangen chey chisu. Anch watek yisakin ya Want pa ndond ya kusambish, milong yikwau akukwanzukinay, ni ukwiyov nawamp nakash mu chikumangen chey chisu. (Mat. 6:33) Piukushakama mu chikumbu chey chisu, ukusot kuyitazuk akadivar amwing a mu chikumangen kwez ni kukwendil ni kwijikijan nau nawamp nakash.​—⁠Rom 12:13b.

Kuham udi mudimu umwing ujim. Pakwez, anch muntu ni muntu wasal yimwitinau kusal, kukwikalap mpwich ja muspiritu. Antu awonsu akwitiy kusanger rukat ra ukadivar wa Ukristu.