Ov yom ik ukulonda ni muntu udia mwin Yuda?
1 Mu mivu chitot ya kusambish, avud pakach pa ‘aan a Isarel’ akula mutapu uwamp ku kulejan kwa Yesu ni kwa apostol end. (Midimu 10:36) Mud kamu muchadinga chakin pasak, Ayuda avud a muchim utok atambwil nlel uyakin nich muchim umwing— kangal kusu mu Isarel pakwez mu Russie, mu États-Unis, ni mwi ngand jikwau. Ov usotin kwikal ni mabuj nakash mu kupan uman kud antu adia Ayuda? Yiyul yilondwila ey yikukukwash kupan uman nich manangu kud Ayuda ipanina nakash mu milong ya difukwil ni kud Ayuda ayidiwila.
2 Kupan uman kud ayuda ipanina mu milong ya difukwil: Chimeken anch Ayuda ipanina mu milong ya difukwil chisu chivud alondwiling nakash yishankur ya arabi (alej) pa ndond pa kulam mafundish kanang mijikena nawamp. Chakin, amening yishankur mud yikweta usu wa chilik chimwing ni Mifund. Chawiy lel, kasotiningap kwisambin mitu ya milong yijim ya Baibel. Asotining kand kutongin Baibel mud buku umwing wa Ukristu. Pa chinech, chiwapidil kamu nakash piwisambidinany Baibel kusadil mazu “Mifund ya Uhebreu,” “Torah” (Yijil), ap “Mifund.” Mukand umwing upandakena kuwap urijekinau mulong kusu wa Ayuda udi broshir Connaîtrons-nous un jour un monde sans guerre?
3 Ov milong ik yikutwishau kusanger Ayuda ipanina mu milong ya difukwil? Mwaning itiyining anch kuding kusu Nzamb umwing, ukata kumutongin nakash muntu. Itiyidin kand anch Nzamb ukutenchik chikas mu milong ya antu. Ukutwish kusadil milong yiney chakwel kwovijan nau piur pa misamb. Chikwau kand, Ayuda avud atongidining nakash mar mamanau anamakwau pa chisu cha Njit ya Mangand II. Akat kwiyipulang mulong wak walikay Nzamb kuburen kutentam kwinoku, ni chisu ik chikezau kudiosh uyimp. Atuwanyishin nawamp mulong wa kwakul ku yipul mud yiney, chilikej, kwisambin mar mamanau akadivar netu pa chisu cha Nazi (Holocauste).
4 Mwaning, chakwel kwipuk kumusulish mwin kwisamb netu muchim, chiwapinap kwisambin milong ya kwijikan kwa Mesia kwisambishil kamu ya misamb. Pakwez, ukutwish kwisambin mudimu wa Moses mu chishimu cha Isarel ni kumwipul muntu wisambinany nend anch mafundish ma Moses makwet dirumburik nlel. Pichimekena mud chifanyidin kwisambin kwijikan kwa Mesia, ukutwish bil kutang Kuvurik Yijil 18:15 (NW), ulondina anch: “Pakach pa anamakwen, nikez kubudish muprofet, mudi am, chawiy chikezay kusal Yehova kud en— niyen ufanyidinany kumutesh.” Mwipula mwin chikumbu nany wadingay ni kwisambin Moses palonday ya muprofet udia mudi ndiy. Chad lel isambina manans makemp madia mu broshir Connaîtrons-nous un jour un monde sans guerre?, paj 14, paragraf 17 ni 18.
5 Ayuda akad kwipan mu milong ya difukwil amening milong mutapu windj: Kadap Ayuda awonsu akata kwitiy mafundish ma Uyuda. Avud amening kwau milong mu mutapu wau ayinau. Akatining nakash kukasikesh kwikaliku kwa Ayuda ashalijadina, nich yaku yau, yishankur yau, ni mafundish mau, pa ndond pa kusadil difukwil dia Uyuda. Ayuda amwing akad kwipan mu milong ya difukwil ij anch Nzamb udaku pakwez pakad kusal chom ap chimwing—akemp kusu adi akad kwitiy kwikaliku kwa Nzamb. Chakusambish, akemp kusu akutwisha kwitiy anch wasadil nakash Mifund ya Uhebreu. Chikwikal cha ukwash nakash kusambish misamb mud kamu wisambin ni muntu mwin mwawonsu wakad kwikal ni difukwil. Chilikej, ukutwish kurumburil, mutapu uletinay Baibel ukwash pa chirung chetu. Anch mwin kwisamb ney kitiyidinap anch Baibel udi upepidilau, milong yimwing yidia mu broshir Connaîtrons-nous un jour un monde sans guerre? Yikutwish kwikal ya ukwash, nakash kamu milong yidia mu chikunku chidia pa paj 3 chikweta mutu wa mulong “Ov Baibel—Udi Upepidilau kud Nzamb?”
6 Piupanina uman kud mwin Yuda, ukutwish kulond anch:
◼ “Avud pakach petu twamana kal mar ma kufish mukatish netu. Ov yom ik yikata kutushiken pitukufanga?” Chingel chakul. Kupwa pwitin yitongijok ya mwin kwisamb ney ku kapalikany kakweta mutu wa mulong “Rufu ni Mupim—Yom Ik?” pa paj 22 wa broshir Connaîtrons-nous un jour un monde sans guerre? Kapalikany kisikejin yilondina Mifund piur pa mwom kwinyim kwa rufu nich yifundishiningau arabi (alej). Kupwa tuya ku paragraf 17 pa paj 23, ni kulejan anch kulondulijan ni Mifund, afu akez kuyivumbwil pa divu dikarumwinau paradis. Pan broshir. Mulong wa kurijek kuchirikinamu kusu, ukutwish kulejan anch nshakur Job wadinga ni ruchingej ra divumbuk. Tal mifund yijimbwilau kwisudiel kwa paragraf 17, ni kulejan dichuku diukweza ni kuyisambinany.
7 Abuku a Mateu, Marko, Luka, Yohan, ni Midimu alejen jinsangu ja Ayuda atesha uyakin ni kuusadil. Yehova uchishil njil wash mulong wa mwom wa chikupu. Ayuda avud a muchim utok akutwish kand kwilej piur pa Yehova, Nzamb wakin, chakwel niyawiy ashakam chikupu mu mangand masu ma Nzamb —Mik. 4:1-4.