Mudimu wa kulejan utushalijadishin
1 Antu avud akat kwipul anch, “Ov yom ik yiletina kushalijan pakach pa Atuman’a Yehova ni yifukwil yikwau?” Ov mutapu ik ukutwisha kwakul? Ukutwish kurumburil yitiyij yetu yimwing yimanyidina pa Baibel. Ov watongidin kand kulejan mutapu utushalijadishina mudimu wetu ni yifukwil yikwau?—Mat. 24:14; 28:19, 20.
2 Nlel, kudi in kwifukwil akemp akata kusot kwisambin yitiyij yau ni akwau. Akutwish kutong anch chiwanyidin kwau kuziyil yijil ya Leta, kwikal ni mwom wishitwila, ap kuyisadil akwau yisal yiwamp. Pakwez, kakutongangap anch afanyidin kuyikwash akwau kwilej yilondina Baibel mulong wa kuman dipandish. Ov mutapu ik tushalijadina?
3 Mudimu wetu wa mushiku umekeshin kushalijan kujim nich mijikit ya yifukwil yikwau. Mu mivu 100 ni kusut, Atuman’a Yehova a chirung cha katat, alejen nich kujijaman rusangu ruwamp kushik ni kwisudiel kwa divu mud in Kristu a kusambish. Rutong retu mu kusal mwamu ridi ra kuyikwash antu avud mud chitwishikina chakwel ambatanisha mwom wau nich rusot ra Nzamb.—1 Tim. 2:4; 2 Pit. 3:9.
4 Ov chaku ik ukweta? Ov akwij mud mwin kulejan wa Dizu dia Nzamb ukweta mushiku? (Midimu 17:2, 3; 18:25) Mulong wa mudimu wey wa kulejan, ov chiyiswapedil akwen kuman kushalijan kudia pakach pa difukwil diau ni dieyey? Ov akwij mud muntu usotininga chisu chawonsu kwisambin ruchingej rend nau akwau? Ov ukwet chaku cha kubudikin pakad kujing mu mudimu wa kulejan? Tuvurikany anch tushalijadinap kusu mulong wa dijin dietu pakwez tushalijadin kand mulong wa kusal kwetu yirumburikina dijin dined—kupan uman piur pa Yehova.—Isa. 43:10, NW.
5 Rukat mulong wa Nzamb ni akwetu rawiy ritubachikina kusal mujikit wa kulejan. (Mat. 22:37-39) Chawiy lel, mud Yesu nau apostol, tusotin kwisakin chisu chawonsu mulong wa kulejan uruu wa Want kud akwetu. Tujijamanany kulejan rusangu ruwamp nich mushiku kud antu asotina kuritesh. Kusal mwamu kukuyikwash antu a michim yiwamp “kuman kushalijan pakach . . . pa muntu umusadidina Nzamb ni muntu wakad kumusadin ndiy.”—Mal. 3:18, NW.