Ov nany ukutwisha kwitiy dilejan dia Baibel?
1 Profet Amos walonda anch kukwikal nzal mwi ngand ya Isarel, “nzal, yidap nzal ya mabot bwat, ni impu yidap ya mem bwat, pakwez ya kutesh mazu ma Yehova.” (Amos 8:11, NW) Mulong wa kuyikwash antu afila nzal ni impu ya muspiritu, dirijek dia Yehova dikat kupalangesh mikand ya chibaibel yivud nakash pa mangand pawonsu.
2 Kushik ni nlel muten, twachapin kal mamiliyon 70 ma mabuku Connaissance ni mamiliyon 91 ma mabroshir Nzamb Witin. Tukat kusanger kwovikan ni ukwash wa mikand yiney pitukata kufundish uyakin. Pakwez, tunan twa antu atambwila mikand yetu kand kal asambisha kwilej netu Baibel. Yom ik tukutwisha kusal pa chinech?
3 Kupan kwa mukand kwawonsu kukutwish kurumburik dilejan dia Baibel! Tushinshikinany rusangu ra mwin kulejan umwing wamwita mband umwing kwilej nend Baibel pisambay nend kapamp ka kusambish kwol kwend. Witiya kapamp kamwing. Kupwa, wamuleja anch: “Udi muntu wa kusambish kwingit kwilej ney Baibel.” Ov mu teritwar wen, mudi antu inch akweta kal mikand yetu akutwisha kulond chilik chimwing? Kupan kwa mukand kwawonsu kuletining mutapu wa kuchirikinamu kusu ni kusambish dilejan dia Baibel.
4 Mulong tupamp tuvud tukakusankanang antu akweta kal mikand yetu, ov mutapu ik tukutwisha kuvuvurish kusanger kwau mu kwilej yom yidia mu mikand yetu? Nambaz umwing wamwipula kamu mband umwing anch wadinga ni yipul ya kwipul piur pa Baibel, mband winou wamwakula anch, “Bwat.” Nambaz wajijamana kulond anch, “Chakin kamu ukwet chipul.” Mwamu kamu mwasalay, ni dilejan diasambisha. Ov mulong wak ukutwishap kumwipul muntu anch usotin kwijik yitongijok ya Baibel piur pa chipul ap mulong umwing ukwetay? Ikal tayad kwipul chipul chimusangarishina anch kakwetap ya kulond. Mambamb ma mutapu winou makutwish kushiken ku kwilej mauyakin ma dishin ma Baibel chisu ni chisu.
5 Mujikit wa Malejan ma Baibel chidi chikunku cha usey nakash cha mudimu wetu. Mulong twijap kwetu nany ukutwisha kwitiy dilejan, kangal twidjidjek (twikak) kuyit awonsu itusankena kwilej nau. Tumutudinany Yehova milong yetu mu malembil, ni kusadin kulondulijan nich malembil metu. Tukutwish chad lel kuman anch antu kanang itwitina kwilej nau akwitiyin!—1 Yohan 5:14, 15.