Twilakejany kuburen kasolikany kwa Yehova
1 Yehova ukat kuyitongin antu. Pakad kasolikany, ukat kwitiy muntu mwawonsu ukata kusal rusot rend. (Midimu 10:34, 35) Yesu padingay ni kuyifundish antu, niyend kadingap ni kasolikany. (Luka 20:21) Tufanyidin kuyilakej, mud mwasalay Paul, wafunda anch: “Mwant ndiy umwing, udi Mwant wa awonsu, udi mpich kud awonsu akutazuka padiay ndiy.”—Rom 10:12, Testament Musu ni Kuseng.
2 Kulejan rusangu ruwamp ra Want wa Nzamb kud antu awonsu itusankena kuletining uyaj kud Nzamb. Tufanyidin kudandamen kulejan uruu winou upandakena kuwap kud akwetu, wikalap nchik ulomb wau wa chikand, mwikadil wau, shikol yilejau, ap dipit dikwetau (mpich ap kazweny). (Rom 10:11-13) Chinech chirumburikin kuyifundish antu asotina kutesh—amakundj, amband, ansand, ni amapal. Tufanyidin kuyendil awonsu ku chis ni chis mulong wa kuyinkish chisu cha kutesh uyakin.
3 Tuyisangerany antu awonsu: Rutong retu ridi ra kutwish kwambamb ni antu avud. Nich yitongijok yiney mu manangu, in kulejan amwing amen mabuj mawamp mu kupan uman mu mabiro ma adokter, mu mahopital, mu yikumbu ya kwiswedishin, mu masantre mukatau kuyokin in kukwachik (damb ni maar), mu mabiro ma commune ni mu mapost ma polis. Chikwau kand, in kulejan apana uman kud in kuteng madil, antakel a shikol, in kupan yiyul, ni anzuj. Pitwisambina ni antu a mutapu winou, chiwapidil kumekesh kujikitish kwetu mulong wa mujikit wau wa ukwash nakash. Twikalany ni kalimish, ni tutondany mitu ya milong yifanyidina nich mujikit wau ni milong yambatena nich.
4 Chilakej, nambaz umwing wisamba ni nzuj umwing mu biro wend. Kwinyim kwa misamb yimwing yisangarishina, nzuj walonda anch: “Ov wij yinikatininga kud Atuman’a Yehova? Akweting yijidik yikash pakwez kakuyijirilangap bwat.” Amwinkisha muntu winou wa katumb uman umwing uwamp nakash.
5 Tukutwishap kutang mu michim ya antu. Pakwez, anch tukakwambamb ni antu awonsu tusankena, tumekeshin ritiy retu mu ukash wa Nzamb wa kutakel mudimu wetu. Chikwau kand, chinech chiyinkin antu mutapu wa kutesh ni kwitiy uruu wa ruchingej. (1 Tim. 2:3, 4) Tusadilany komb lel chisu chetu nich manangu ni tusalany usu wa kwilakej kuburen kasolikany kwa Yehova nich kulejan rusangu ruwamp kud antu awonsu tukutwisha kusankan.—Rom 2:11; Efe. 5:1, 2.