Mekesh Kusanger kwa Pakampwil —Ku Kulejan Pakad Kasolikany
1 Mupostol Yohan, wamana mu chishimushimu mwangel utwikina mwiur wend wayilej antu a “michid yawonsu, ni majuku, ni jindim” rusangu ruwamp ra chikupu. (Kubur. 14:6) Ov, tukat kulondul chilakej cha mwangel cha kulejan pakad kasolikany? Tukutwish kwikal nich yitongijok yiyimp ap ya kasolikany, pakad kwijik. Manangu metu piur pa antu tusankena makutwish kwikal nich yibudikin pa mutapu tuyilejina rusangu ruwamp. Chawiy lel, tuswiridin kumekesh rukat rakin chisu tuyilejina antu akweta yaku ya yishankur yindjing.
2 Shinshikin Teritwar Wey: Ov, kudi antu abukina ap arefije ashicha mu teritwar wey? Chikwikal chikash kuyidimukin. Ikal wa kusambish kuya kuyikimb antu inay awonsu ni sal usu wa kuyijik nawamp. Ov, misu maswir mau ni yik yisotilau, yik yikatinau ni yikisinau, yakamish yau ni yaku yau? Sal usu wa kwambatanish minsamb ya uruu wa Want. (1 Kor. 9:19-23) Mud mupostol Paul, tufanyidin kwiyov anch tukwet chisend cha kumulej muntu ni muntu udia mu teritwar wetu rusangu ruwamp, pamwing ni antu adiokila mwi ngand ya wingendj, antu akweta yishankur yishalijadina ni yetwetu, ni antu alondina rudim rukwau, ap adia ampich nakash.—Rome 1:14.
3 Mutapu ik lel, ukutwisha kuyilej antu alondila rudim rukwau? Sadil nawamp broshir Une bonne nouvelle pour des gens de toutes nations. Ukutwish kand kusend matrakt ap mabroshir ma jindim jikwau jilondinau nakash mu teritwar wey. (Tal Mudimu Wetu wa Want wa Kafunfut 2003, p. 4, par. 2-3.) Chikwau kand, in kulejan amwing asadil usu wa kwilej mutapu wa kupan moy ni wa kusambish minsamb uswapela mu jindim jikwau. Antu akat kusanger kumutesh muntu upakishina kwambamb nau mu rudim rau, ap mu mazu makemp kusu, ni mulad winou wa kulejan ukat kuyipwitin ku rusangu ruwamp.
4 Tumwimburijany Yehova: Pituyilejina antu akweta mikadil ya yishankur kushalijan, tukat kumwimburij Yehova, Nzamb wetu, wakad kasolikany “usotila kuyipandish antu awonsu ni kwez kwijik uyakin.”—1 Tim. 2:3, 4.