Antu “A Jindim Jawonsu” Ateshin Rusangu Ruwamp

“Antu dikum a jindim jawonsu ja michid akez [kulond] anch: ‘Tusotil kuya ni yeyey, mulong tuteshil anch Nzamb udi ni yeyey.’” —ZAKARIY 8:23, NW.

1. Mutapu ik watenchikay Yehova chisu ni mwikadil yiwamp mulong wa nsambishil ya Ukristu kud antu a jindim jawonsu ni michid yawonsu?

CHISU ni mwikadil kiyadingap yiwamp. Diadinga dichuku dia Pentekot 33 C.C. Mbing kurutu, in Yuda ni antu akad kwikal in Yuda itiyija kudiokal ku materitwar piswimp 15 mu kujimb kwa Want wa in Rom ni kwindjing izula bwafu mu Yerusalem mulong wa kusal musambu wa Kusut kwa Yehova. Pa dichuku dined, tunan twa antu pakach pau ova—chadingap mu kanrumbangesh mud muchadinga ku Babel wa pakur pakwez nich kutesh kurumburik—amakundj ni amband izula nich spiritu utumbila alejana rusangu ruwamp mu jindim kushalijan jadingau ni kulond mu winyikel wa Rom. (Midimu 2:1-12) Chisu chinech chikala nsambishil ya chikumangen cha Ukristu ni pawiy pasambisha mudimu wa kufundish mu mangand mawonsu, ni mu jindim jivud wadandamena djat ni ilel.

2. Ov, mutapu ik in kwilej a Yesu wayishimokishau in kuyitesh au kushalijan pa Pentekot 33 C.C.?

² In kwilej a Yesu adinga ni kulond Ugrek uswapela, rudim radingau kulond antu awonsu pa chirung chinicha. Alondanga kand chin Hebereu, dizu diadingau kulond ku tempel. Pakwez, pa dichuku dined dia Pentekot, ‘ayishimokisha’ in kuyitesh kushalijan pa kulond mu jindim ja chivadik ja antu inay. Kwadinga chibudikin ik? Michim ya in kutesh yakwachika nich uyakin wa kupan mwom wateshau mu jindim jau ja chivadik. Kwisudiel kwa dichuku, ka chirund kakemp ka in kwilej kajimba kikal chirund chijim cha antu 3000 ni kusut!—Midimu 2:37-42.

3, 4. Ov, mutapu ik wapalangana mudimu wa kulejan mud mwadingau ni kushemunik in kwilej kudiokal mu Yerusalem, Yuda ni Galilaya?

³ Kwinyim kamu kwa chishiken chinech chamushena, kuzengol kukash kwalanka mu Yerusalem, ni “awiy apalangana, ading ni kuya ni kulejan dizu.” (Midimu 8:1-4) Chilakej, tutangin mu Midimu shapitre wa 8 piur pa Filip, umeken kamu kwikal mwin kulejan walondanga Ugrek. Filip wayileja in Samaria. Wamuleja kand mwant mwin Etiopi witiyija ku uruu piur pa Kristu.—Midimu 6:1-5; 8:5-13, 26-40; 21:8, 9.

⁴ Padingau in Kristu kushemunik ni kusot jindond ja kushakam pol pa jindond jiwongina ja Yerusalem, Yuda, ni Galilaya, atana yikangesh yikwau yisu ya kabil ni ya rudim. Amwing au adinga kulejan ching kusu kudiau in Yuda. Pakwez mwin kwilej Luka ulondil anch: “Pakwez in kwitiyij akwau, adiokal ku Shipre ni ku musumb wa Siren, ni yau aya ku Antiosh ayileja kand in michid yikwau, ayirumburila Rusang Ruwamp ra Nsalejetu Yesu Kristu.”—Midimu 11:19-21, Manswik Masu.

Nzamb Wakad Kasolikany —Uruu kud Antu Awonsu

5. Ov, mutapu ik umekena kuburen kasolikany kwa Yehova kwambatan nich rusangu ruwamp?

⁵ Kuya kurutu kwinoku kwambaten nich jinjil ja Nzamb; ndiy kakwetingap kasolikany. Kwinyim kwa kambuy Pita kumukwash kud Yehova chakwel atenchika yitong yend piur pa antu a michid yikwau, walonda nich kujikitish anch: “Komb chidi chakin nijik kal Nzamb kakwetip kasolikany ka muntu; Pakwez ukat kwitiyij kwend kudi wa muchid wawonsu ukata kumwov ndiy wom ni kusal midimu ya kutentam.” (Midimu 10:34, 35; Kuseng 145:9) Pa chisu chezay kambuy Paul, wadinga pakur mwin kuyizengol in Kristu, kulond anch Nzamb “usotil kuyipandish antu awonsu ni kwez kwijik uyakin,” wakasikeshina kand anch Nzamb kakwetingap kasolikany. (1 Timote 2:4) Kuburen kasolikany kwa Sakatang kumekedin kusutil ku ruchingej ra Want ripaninay kud antu amakundj ni amband, a ulomb wawonsu, a michid yawonsu, ap rudim rawonsu.

6, 7. Uprofet ik wa Bibil wabwaka kupalangan kwa rusangu ruwamp mu mangand mawonsu, mu jindim jivud?

⁶ Kupalangan kwinoku pa mangand mawonsu akulejana yitot ya mivu kurutu. Kwambatan nich uprofet wa Daniel “amwinkisha [Yesu] usu wa kuyikel ni uyaj, ni want, chakwel antu a michid yawonsu, ni a mitapu yawonsu, ni a jindim jawonsu amusadil ndiy.” (Daniel 7:14) Uyakin udi anch kupalangesh kwa gazet winou mu jindim 151 ni kumwangan mu mangand mawonsu, kukutwishishina ey utanga piur pa Want wa Yehova, kumekeshin kuwanyin kwa Uprofet winou wa Bibil.

⁷ Bibil wabwaka chisu chikezau antu a jindim kushalijan kusot kwiteshil ayinau uruu upanina mwom. Parumburilay mutapu difukwil diakin dikeza kuyipwit avud, Zakariy wabwaka anch: “Mu machuku minima antu dikum a [jindim ja] michid yikwau akez kez kudi mwin Yuda umwing [mwin Kristu uzizidilau many, chid cha “Isarel wa Nzamb”] kumulej anch: ‘Tusotil kubombakan ni yeyey, mulong tuteshil anch, Nzamb udi ni yeyey.’” (Zakariy 8:23; Galatia 6:16) Pashimuninay yom yamanay mu chishimushimu, kambuy Yohan walonda anch: “Naman ni kushinshik chisak chipandiken kujimb, chakad kutwish kuchind kudi muntu, mupwidil michid yawonsu ni majuku mawonsu, antu a mangand mawonsu ni jindim jawonsu, iminy kurutu kwa nkwas ni kurutu kwa Mwan a mukoku.” (Kujingunik 7:9) Tumen mutapu uwanyidina uprofet winou!

Kuyishiken Antu a Mitapu Yawonsu

8. Ukinakin ik udiaku ilel usadila anch kwikal kutenchik mu mudimu wetu wa kupan uman?

⁸ Ilel, antu ikadil kal in kwendangan nakash. Umwing wa mangand waletin kal chirung cha kushemunok. Yisak ya antu yichinina materitwar mudia njit ni materitwar mudia mar ma ekonomi yikat kushemunikin mu jindond jikweta mashakamin mawamp, mulong wa kusot mapit ma ku mujimbu ma kuking mwom. Mu jingand jivud, kwez kwa antu avud adiokal kwindjing ni in kuchin njit kwikadil kal nich chibudikin cha kwikalaku kwa materitwar ma in kulond ndim ja wingendj. Chilakej, mu Finland akat kulondamu jindim 120 ni kusut; mu Australie uvud udi wa jindim 200 ni kusut. Mu musumb umwing kusu mu États-Unis—San Diego—chitwishikin kuteshamu jindim 100 ni kusut!

9. Chitong ik tufanyidina kwikal nich pa kuyiman antu alondila jindim jindjing mu teritwar wetu?

⁹ Ov, chitudia atushalapol in Kristu tumen kwikalaku kwa antu inay alondila jindim kushalijan mud chikangesh ku mudimu wetu? Bwat kwau! Pakwez, tumen kwikalaku kwa antu inay mud kujimb kusangareshina kwa teritwar wa mujikit wetu—‘yingand yatokin kal mulong wa kuyangul.’ (Yohan 4:35) Twikasikeshin mulong wa kuwanyish maswir ma antu akweta kuswir kwa yom ya muspiritu, chikalap nchik muchid wau ap rudim rau. (Mateu 5:3) Mud chibudikin, muvu ni muvu uvud upandikena wa antu a ‘jindim jawonsu’ akat kwikal in kwilej a Kristu. (Kujingunik 14:6) Chilakej, mud pa Kafumpul 2004, mudimu wa kulejan mu Allemagne wasadika piswimp mu jindim 40. Pa chisu chawiy chimwing, rusangu ruwamp adinga ni kurilejan mu Australie piswimp mu jindim 30, ni kwiwejidin jindim 18 mu mivu dikum yasutilaku. Mu Grèce, Atuman a Yehova adinga kwisamb ni antu mu jindim kushalijan 20. Mu mangand mawonsu, piswimp Atuman a Yehova 80 pa chitot alondil rudim rindjing rakad kwikal Inglish, rudim ripalangena nakash mu mangand.

10. Wisu mudimu wa katwambil umwing ni umwing mu kwikadish in kwilej kudiokal ku antu a “michid yawonsu”?

¹⁰ Chakin kamu, mbil ya Yesu ya ‘kuyikadish in kwilej, antu a michid yawonsu’ ayiwanyishin! (Mateu 28:19) Chakinau nich kutakaman mudimu winou, Atuman a Yehova asadil mudimu mu jingand 235, angen mikand mu jindim 400 ni kusut. Piditenchikina dirijek dia Yehova yom yiswirikena chakwel kuyishiken antu, katwambil wa Want umwing ni umwing ufanyidin kusal usu chakwel kusamburish uruu wa Bibil kud “antu a mitapu yawonsu” mu rudim rikutwishau kutesh nawamp. (Yohan 1:7, NW) Usu winou wa kukungin pamwing utwishishin mamiliyon ma antu a yirund kushalijan yilondila jindim kushalijan kwisakin rusangu ruwamp. (Rom 10:14, 15) Inge, umwing ni umwing wetu ukwet mudimu wa usey!

Kupandakan Chikangesh

11, 12. (a) Yikangesh ik tukutwisha kutan, ni mutapu ik ukata kukwash spiritu utumbila? (b) Ov, mulong wak chiding cha ukwash kuyilej antu mu rudim rau ra chivadik?

¹¹ Ilel, atutwambil avud asotil kwilej rudim rindjing, pakwez kakutwishap kuchingejin pa yipan ya yilay ya spiritu wa Nzamb. (1 Korint 13:8) Kwilej rudim risu udi mudimu ukash. Ap antu alondila rudim ra kaad afanyidin kutenchik mutapu wau wa kutong ni mutapu wa kurisadil chakwel kwikadish uruu wa Bibil usangareshina kud antu alondila rudim riner pakwez akweta mikadil ni yaku ya ngand yishalijadina. Chikwau kand, angez asu abutwalela; kutesh mutapu wau wa kutong kwitining mudimu ukash.

¹² Chikalap nchik mwamu, spiritu utumbila udandamedin kusal mukach mwa atushalapol a Yehova chakwel ayikwasha antu alondila jindim jindjing. (Luka 11:13) Pa ndond pa kupan ukaliweny wa yilay wa jindim, spiritu utumbila ukutwish kuvudish impu yetu ya kwambamb ni antu alondila rudim rishalijadina ni retwetu. (Kuseng 143:10) Kuyilej ap kuyifundish antu uruu wa Bibil mu rudim rakadau kwijik kukutwishap kushik ku michim yau. Pakwez, chakwel kushik ku michim ya in kututesh, chiding chisu ni chisu chiwamp kusadil rudim rau ra chivadik—rudim rikwatina ku yovil yau yikash, yibachikin yau, ni ruchingej rau.—Luka 24:32.

13, 14. (a) Chom ik chayibachika antu amwing kusot kusal mudimu mu rudim rindjing? (b) Mutapu ik umeningau spiritu wa kwipan?

¹³ Atutwambil avud a Want asadil mudimu mu chingand cha wingendj pamanau kwakul kuwamp ku uyakin wa Bibil. Akwau akat kwiyovang akasikeshinau piukata mujikit wau kwikal witina kusal usu ni usangareshina. Mutiy umwing wa biro wa Atuman a Yehova udia mwi Mputu wa kurul ulondil anch, “Antu avud adiokila mwi Mputu wa Kwingangel akwet impu ya uyakin.” Chisangareshin mud ik kuyikwash antu inay itiyijina!—Isay 55:1, 2.

¹⁴ Pakwez, chakwel kusadil muchifanyidina mu mudimu winou, chitin kutakaman ni kwipan. (Kuseng 110:3) Chilakej, uvud wa majuku ma Atuman a mu Japon ashil kal yikumbu yau yiwamp mu misumb yijim-yijim ni ayil kal ku materitwar ma kulemp kuyikwash angez in Chine kutesh Bibil. Kurand kwa États-Unis, chisu ni chisu atutwambil ayiling weny wa motak wa saa umwing ap aad mulong wa kutakel malejan ma Bibil ni antu adia mu chingand cha Filipine. Mu Norvège, ambay a uruw ilejin ni dijuku dimwing diadiokala mu Afghanistan. Ambay a uruw Atuman asadidil broshir Nzamb Witin Etu Tusal Ik? wa Inglish ni wa rudim ra in Norvège.a Dijuku diatang maparagraf mu rudim ra in peris (Persian), rudim ridia piswimp ni rudim rau ra chivadik Dari. Isamb mu Inglish ni Chinorvege. Spiritu winou wa kwipan ni kwiyambatanish nich udi uyukishinau pakatau angez kwakul ku rusangu ruwamp.b

15. Ov, mutapu ik tukutwisha etu awonsu kulejan mu jindim jivud?

¹⁵ Ov, ukutwish kusadil mu mujikit winou mu jindim jivud? Ov, mulong wak ulikina kushinshikin bil jindim ja wingendj jilondilau nakash mu teritwar wen? Chad lel ukutwish kusend matrakt mamwing ap mabroshir mamwing mu jindim jinej. Kabroshir Rusangu Ruwamp kud Antu a Michid Yawonsu, kapalangeshau mu muvu wa 2004, kikadil kal chom cha mudimu chikash mu kupalangesh ruchingej ra Want mulong wa uruu wak uswapela kutesh, ni ukasikeshina udia mu jindim jivud.—Tal mutu wa mulong “Rusangu Ruwamp kud Antu a Michid Yawonsu” udia pa paj wa 32.

“Mukatany Mweny”

16. Mutapu ik wamekeshau akadivar akweta yisend kuyisakin akwau mu kuyikwash antu alondila rudim ra wingendj?

¹⁶ Ap anch twilejin rudim rindjing ap bwat, tukutwish etu awonsu nich diyiy dia muspiritu kuyikwash angez adia mu mwab wetu. Yehova wayileja antwend anch “mukatany mweny.” (Kuvurik Yijil 10:19) Chilakej, mu musumb umwing ujim wa mu Amerik wa Kwindum, yikumangen yitan yikat kukumangen mu Chot cha Want chimwing. Mud muchidia mu yot yivud, akat kuswimpang pa muvu ni muvu yisu ya yikumangan yikutwisha kushemunin yikumangan ya mu rudim ra in Shine kwinikwa urel nakash Diarubing. Pakwez, chom chinech charumburika anch angez inay avud asadila mudimu ku restoran usadila djat urel nakash kakutwishap kwau kukumangan. Amakurump mu yikumangen yikwau nich kalimish asala yitenchik chakwel anch yikumangan ya mu rudim ra Shine yisambelang kusadik kurutu kwa chisu Diarubing.

17. Mutapu ik tufanyidina kwiyov pakatau antu amwing kukwat mupak wa kushemunik mulong wa kukwash chirund chilondila rudim rindjing?

¹⁷ Atulam in rukat ayijikitishin akadivar ni anambaz awanyishina yitinau ni akweta nkeu asotila kushemunik kuya kukwash yirund yilondila rudim rikwau. Alej inay a Bibil akweta nkeu akutwish aburen pol pen, pakwez atulam ovil chilik chimwing mud mutapu wovau amakurump a mu Listre ni mu Ikonium. Amakurump inay kamulikishap Timote kuya pamwing nend Paul, ap anch Timote adinga amusadidil nakash mu yikumangen yau ayinau. (Midimu 16:1-4) Chikwau kand, in akata kutakel mudimu wa kulejan, kakatap kukangany mulong wa ngikadil, yaku, ap yisal yindjing ya angez. Chinyim ni chinech, awiy akat kwak kushalijan ni kusot jinjil ja kukudish urund uwamp mulong wa rusangu ruwamp.—1 Korint 9:22, 23.

18. Chis ik chijim cha mujikit chanzurikina kud awonsu?

¹⁸ Mud mutapu wabwakau, rusangu ruwamp akat kurilejan mu “jindim jawonsu ja michid.” Kuchidi kand ruchingej rikash ra kwiwejinaku mu yingand ya jindim ja wingendj. Tunan twa atutwambil akweta ukaliweny andamin mu ‘chis chijim chitwadila ku mudimu ukash.’ (1 Korint 16:9) Pakwez, kuswirikedin kand yom yikwau yivud chakwel kukudish materitwar minam, mud mukeza kulejan mutu wa mulong wambakedinap.

[Mazu madia kwishin kwa paj]

Ov, Ukutwish Kurumburil?

• Ov, mutapu ik tukutwisha kumwilikej Yehova mu kumekesh kuburen kasolikany kud antu awonsu?

• Mutapu ik tufanyidina kuyiman antu adia mu teritwar wetu akad kulond rudim retu?

• Ov, mulong wak chidi cha ukwash kuyilej antu mu rudim rau ra chivadik?

• Mutapu ik tukutwisha kumekesh kuyibangin angez adia mukach mwetu?

[Chipich chidia pa paj wa 23]

Pa Pentekot 33 C.C., antu kudiokal ku materitwar 15 ya Want wa Rom ni kwindjing atesha rusangu ruwamp mu jindim jau ja chivadik

[Chipich chidia pa paj wa 24]

Angez avud akwil nawamp ku uyakin wa Bibil

[Chipich chidia pa paj wa 25]

Chot cha Want chisadidilau mu jindim jitan