Kuyikumangej Pamwing Antu a Jindim Jawonsu
1 Dizu dia Nzamb dikat kushiken! Antu “a jindim jawonsu ja michid” akat kwitiyin difukwil diakin. (Zak. 8:23, NW) Mutapu ik lel ukatau Atuman’a Yehova kuyikwash antu a “michid yawonsu, majuku mawonsu, ni jindim jawonsu” kwikal itiyikina kudiay Yehova, ni kwikal nich ruchingej ra kupand ku “mar makash”? —Kuj. 7:9, 14.
2 Yakul ya Dirijek dia Nzamb: Chisak Chitakedila chakwatin kal ditenchik mulong wa mikand ya pa dishin dia Baibel yikalaku mu jindim piswimp 380 chakwel anch antu pa divu diawonsu akutwish kutesh nawamp kamu usey wa rusangu ruwamp. Kurijek ni kupalangesh mikand mu jindim jivud udi mudimu umwing ujim nakash. Witining kukumangej yisak ya in kukarumun awanyishinau nawamp ni kuyinkish ukwash ukwetau nich kuswir chakwel kukarumun mikand yetu mu jindim jinej jawonsu, kuchap ni kuyitum yom yiney. Pakwez, chisend cha usey, akat kuchiwanyish kud in kulejan a Want, akata kutwal uruu wa dipandish wa Baibel kud antu.
3 Kwitiyij Chikangesh: Antu avud akata kulond rudim ra wingendj adiaku katat mu jindond jivud. Chakwel kuyishiken antu inay nich rusangu ruwamp, atushalapol a Nzamb avud akat kusal usu nakash chakwel kwilej rudim ra in Chine, in Rusi, ni Espanyol ap ridim rikwau rilondinau nakash mu teritwar wau. Akwau akat kwilej Rudim ra Yijingidij ra in Amerik. Mwaad wau, Congo-Kinshasa ni Congo-Brazzaville, mudi yikumangen 2489 ni yirund 63 yikata kulejan ni kusadil mikand mu jindim jikwau 17 kuwejin ku Français. Antu adinga kand kal ateshap piur pa Yehova ap kwijik chom kanang piur pa Baibel akat kwitiyij uyakin wa Dizu dia Nzamb.—Rom 15:21.
4 Ov, tukutwish ayinetu kusal usu nakash wa kulejan rusangu ruwamp kud antu adia mu teritwar wetu adiokila mwi ngand yindjing? (Kol. 1:25) Yikumangen yivud yikat kutenchik kusadil mudimu wa kulejan mu mwab ushichau angendj. Chakusambish in kulejan akat kwilej mutapu uwanyidina rudim ra wingendj chakwel kulond mazu ma kusambish nich maswapela, mud: “Walankany. Tukuletidinany rusangu ruwamp. [Kupwa wapan trakt ap broshir udiaku mu rudim rinira.] Shalany nawamp.” Chakin kamu Yehova ukat kuyukish nsambishil yiney yikemp!
5 Uruu wa Want ukat kuyisangaresh antu a milad yawonsu ni a jindim yawonsu. Tusadilany yisu yin yawonsu yitumena chakwel kwisamb nau pamwing.