Ov kand kal tuyiteshap?
1 Chakin twayitesha kal! Yehova ukakuchirikinang yom yivud mu Dizu diend mulong wa kuwap kwa antwend. Yesu wadinga ni kuchirikin yisu yivud mafundish mend piur pa mitambu kushalijan ya Want. Apostol end padingau ni kwisamb ni antu ajijamena kal mu uyakin, ading ni kuchirikin chisu ni chisu milong ya muspiritu.—Rom 15:15; 2 Pita 1:12, 13; 3:1, 2.
2 Mu chirung chetu, dirijek dia Yehova dirijekin mitu ya milong ya usey chakwel ayichirikina chisu ni chisu mu yikumangan ya chikumangen. Twilejin kal mikand yimwing tupamp tuvud. Mwaning, chidi cha usey kutesh kand yom yitwateshap kal!
3 Kuchirikin kudi kwa usey: Malejan ma Yehova majimbishin mutapu wetu wa kutesh yom, matanduril yitongijok yetu, ni kukasikesh kukankaman kwetu kwa kushal mwi njil ya Ukristu. (Kus. 119:129) Pituchirikidina yijil ni jinkand ya Yehova chidi kamu mud kutal mu dikalash. Chinech chitukwashin kwishinshikin ayinetu ni kukangesh chibachikin cha kwikal ‘mwin kutesh ukata kuvuramen.’—Jak. 1:22-25, NW.
4 Anch twalik kuchirikin chisu chawonsu mauyakin mitwilejina, yom yikwau yikukarumun michim yetu. Malejan ma Nzamb matukasikeshin kurishish uyimp ujondishina wa mangand ma Satan. (Kus. 119:2, 3, 99, 133; Flp. 3:1) Malejan ma chisu chawonsu piur pa kushiken kwa jintong ja Nzamb matubachikin ku ‘kuchish ku mes.’ (Marko 13:32-37) Kuchirikin mauyakin ma Baibel kutukwashin kushal mwi njil yitwadila ku mwom wa chikupu.— Kus. 119:144.
5 Mutapu wa kumenaku ukwash: Tufanyidin ‘kufumb michim yetu mu malejan ma Nzamb.’ (Kuseng 119:36) Anch isambidin ku chikumangan mutu wa mulong utwija kal, tufanyidin kwirijek kurutu kwa muten, kutang maverse maletinau ni kutongin mutapu tukutwisha kusadil yiyul. Kangal twadiwul kurijek dichirikin dia kufund dia Shikol ya Mudimu ya Uteokras, ni kutong anch dikwetap kwau ukwash. (Luka 8:18) Tufanyidinap ap pakemp kwikal in kutesh akad kuta matu anch mulong chisu ni chisu akakuchirikinang mauyakin ma dishin ku yikumangan yetu.—Heb. 5:11.
6 Twikalany ni yitongijok ya chilik chimwing ni ya mwin kuseng: “Nasangara kal mwi njil ya malejan mey, mudi mu mapit mawonsu.” (Kuseng 119:14) Mwaning, twateshin kal mafundish minam ma usey, ni tukumatesh kand kapamp kakwau. Mulong wak? Mulong Yehova wij anch tukwet kuswir kwa kumatesh!