Tukakulejanang rusangu ruwamp
1 Twitapidil dilau diwamp mud ik dia kwikal in kusend a ‘rusangu ruwamp ra yom yiwamp!’ (Rom 10:15) Tukwet rusangu rumwing rikasikeshina ra kuyilej antu adia mu ruvundu ni aburedina ruchingej. Ov mutapu ik tukutwisha kuyikwash kwijik anch tukakulejanang “rusangu ruwamp ra chom chimwing chipandakena kuwap”?—Isa. 52:7, NW.
2 Turijekany rusangu rumwing ruwamp: Misamb yetu mu chingand yikwikal ni chibudikin chiwamp anch tukakwisambin yom yiwamp. Chawiy lel, piturijekina mutapu wetu wa kupan uman ni kuchirikin mukand tukupana, tukwet kuswir kwa kumekesh mitambu yiwamp ya rusangu. Anch twalejan ruchingej retu rishindamedina pa Baibel nich kashinsh ni mushiku, tukutwish kuchingej mabuj makasikeshina.—Jnsw. 25:11.
3 Ap anch tukweting muchim wa riy pakatau kumekesh antu mutapu umenau mar mulong wa ngikadil yiyimp ya mangand, tufanyidin kuyilej njil yimwing kusu ya kashinsh ya kupwishil milong ya muntu, udi Want wa Nzamb. Ap pitwisambina mulong wa “dichuku dia difundakesh” dia Yehova diezina, tusotin kumekesh mutapu chirumburikina chakin “rusangu ruwamp kud in kwikepish.” (Isa. 61:1, 2, NW) Tukutwish kuyikwash antu twisambina nau kutesh anch yom yawonsu yisadilay Yehova yikez kulet musangar umwing ujim nakash ni chibudikin chiwamp nakash.
4 Tulejanany uyakin nich musangar wa kashinsh: Chisu chikatau kuman antu ngikadil yetu ya musangar ni mutapu wetu wa kulond wa kashinsh, akat kuteshang nakash. Anch tumekeshin chitongijok chiwamp, antu atuteshina akujingunin anch ‘tukwet musangar mulong wa ruchingej retu.’ (Rom 12:12) Chawiy lel, akutwish ap kwikal ni impu yijim ya kwitiy rusangu ruwamp. Chakin kamu, pichuku pichuku tuwapidil kamu kumekesh ngikadil yimwing yiwamp, ya musangar mu mitambu yawonsu ya mudimu wetu wa kulejan.
5 Chitudia atushalapol a rusangu ruwamp, tukat kusal yivud kusut kusu kwijikish. Mudimu wetu wa kulejan ukakupanang ruchingej ra kashinsh ra mwom umwing upandakena kuwap wa katat ni wa machuku ma kurutu. (1 Tim. 4:8) Pitwisambina ni muntu umwing ni umwing, ukaliweny wetu uwamp wa manangu ukumeken mu yitulondila ni ukez kuyikwash antu kwitiy rusangu ruwamp. Anch twata muchim ku yitulondila ni mutapu utuyilondila, tukuyibachik antu a michim yitok kwitiy rusangu ruwamp risangarishina ritukata kulejan!