‘Ov chom ik nikutwisha kusal?’
1 ‘Ov chom ik nikutwisha kusal?’ Chakin anch, chinech chidi chipul chiyipulau antu a chisak chikemp cha in Kwilej a Baibel atakelau kud Charles Taze Russell mu mivu ya 1870. Chadingau ni kuya kurutu mu kutesh kwa rusot ra Nzamb, in kwilej a Baibel inay a pasak adinga ni kwiyipul yikutwishau kusal mulong wa kuyikwash antu akwau kwilej rutong ra Nzamb. Kushikij ronganyin ra Baibel ku mangand mawonsu wadinga chakin mudimu umwing ujim nakash.
2 Cha musangar kud etu, chidi anch atwisha kusal mudimu winou. Mutapu ik? Muntu ni muntu wasala yadinga ni kumekan mudi kachikunku kamwing kakemp, chawiy lel nlel Atuman’a Yehova ijiken pa mangand mawonsu—dirijek dimwing dikweta in kulejan a Want piswimp miliyon musamban asadidina mu yikumangen 90 000 mwi ngand 234 ni masang!—Isa. 60:22, NW.
3 Pan ukwash wey wawonsu: Chidi cha usey anch muntu ni muntu asala mudimu ujim walonday Yesu anch afanyidin kuusal mu machuku minam ma kwisudiel. (Mar. 13:10) Chidi chakin anch mudimu winou tukutwishap kuushil kusu amakurump kanang; ap kand udap ching kusu mudimu wa ayibol. Pakwez, mwin Kristu mwawonsu mwin kwipan ukwet mudimu ujim wa kusal. Etu awonsu tukutwish kusal milad yimwing ya mujikit wa kulejan. (1 Tim. 1:12) Wikalap nchik mutapu tuusadina, tukat kutambwilaku ayinetu ukwash ni akwau.—1 Tim. 4:16.
4 Muntu ni muntu ukutwish kand kupan ukwash ujim ku ukadivar wetu wa Ukristu mu milad yikwau kand ya usey. Tukutwish kukwash yikumangan ya chikumangen anch tukumangen pakad kujing ni kupan yakul nich chirungil. (Kus. 122:1, 8, 9) Tukutwish kupan ukwash wetu chakwel kulam kwishitul kwa chikumangen. Tukutwish kupan ukwash wa nfalang mulong wa mudimu wa mangand mawonsu, kulondulijan nich yitukweta. Tukutwish kukomb Chot cha Want. Muntu ni muntu ukutwish kukwatikesh ngikadil yiwamp ya rukat ni uumwing mu chikumangen nich kuyikwash antu achidia asu, ansand, ni amakurump.—Kol. 3:12, 14.
5 Chawiy lel, ukutwish kwiyipwil, ‘Chom ik nikutwisha kusal?’ Ap anch usu usadila ukutwish kumekan mudi udi ukemp, anch wasal yiukutwisha, ukakuwejin ku kukasikan, kuya kurutu, ni ukash wa chikumangen. Komb lel etu awonsu tukwet mudimu wa usey wa kusal mu kutumbish dijin dia Yehova!