Tumwimburijany Yehova, ‘Nzamb Wetu wa Musangar’
1 Yehova usotil anch antu asangara. Dizu diend ditulejin yiyukish yiwamp yarijekinay kal Nzamb mulong wa antu. (Is. 65:21-25) Chikutwish kumekan kudi antu akwau anch tutanin musangar mu kuyilej antu ‘rusangu ruwamp ra uyaj wa Nzamb wa musangar’. (1 Tim. 1:11) Mutapu tulejena uruu wa Want ufanyidin kumekesh anch tukatin uyakin ni kumekesh anch tuyisangaredin antu tulejina.—Rome 1:14-16.
2 Chakin kamu, yisu yimwing chikutwish kukasikan kurish nich mutapu wa kulam ngikadil ya musangar. Mu materitwar mamwing, tukat kutan antu akemp akata kwitiyij nawamp uruu wa Want. Machuku makwau tukutwish kurish nich mikadil yikash mu mwom wetu. Chakwel kulam musangar wetu, tufanyidin kutongijokin mutapu chidia cha usey nakash kud antu adia mu teritwar wetu kutesh ni kov kurumburik kwa rusangu ruwamp tukata kulejan. (Rome 10:13, 14, 17) Kutongijokin pa chinech kukutukwash kudandamen kulejan nich musangar ditenchik dia ranaken dia dipandish dia Yehova.
3 Tulondany Nakash Yom Yiwamp ya Kurutu: Tufanyidin kudimukin yom tukata kulond. Ap anch tukutwish kusambish minsamb nich kujimbul yom yijau antu mu manangu, tufanyidin kwipuk kulondol yom yakad kukasikesh. Mudimu wetu udi wa kulejan “rusangu ruwamp rawiy kamu rusangu ra chisambu.” (Is. 52:7; Rome 10:15) Rusangu ruwamp udi uruu wimedina pa kushilamu kwa Nzamb mulong wa machuku ma kurutu mawamp. (2 Pi. 3:13) Nich chitong chinech mu manangu, sadil Bibil chakwel “kuyok akweta michim ya runeng.” (Is. 61:1, 2) Chinech chikutukwash kulam musangar ni chaku chiwamp.
4 Antu akat kujingunin ngikadil yetu ya musangar patuyila ni kulejan. Chawiy lel, tumekeshany ngikadil ya Yehova ‘Nzamb wetu wa musangar’, chisu tulejena rusangu ruwamp kud antu a mu teritwar wetu.