Ov ukat kwakul ku rukat ra Kristu?
1 Chadingay ni kuvurik mwom wa Nsalejend, mupostol Yohan wafunda anch: “Yesu wading uyikatil ayend adia pa mangand, ndiy wayikata kamu djat ni kwisudiel kwa mwom wend.” (Yohan 13:1) Pa chirung chinech cha Chivurish, yitongijok yetu yimanyidin pa chisal chijim nakash cha rukat ra Kristu. Tukutwish kwakul ku rukat riner kusutin kwiyijidish ritiy mu difut, kusutin kwikal ni mushiku mu mudimu wa kulejan ni, mud Yesu, kusutin kujijaman “kushik ni kwisudiel.”—Mat. 24:13; 28:19, 20; Yohan 3:16.
2 Twakulany ku rukat ra Kristu: Yesu wasala mudimu nakash mu rubing ra nsudel ra mwom wend pa divu. (Mat. 21:23; 23:1; 24:3) Chitudia in kumwilikej Kristu, ni yetu kand tudi abachikinau nich rukat ‘kwikasikesh ayinetu’ mu mudimu wa Yehova. (Luka 13:24) Ov ukutwishap kusadil nawamp yitenchik yiney chakwel kuwejinaku mujikit wa kupan uman mwi Ndol nich kuvudish chisu usutishina mu mudimu wa kulejan?
3 Muvu unou Yakudia ya Urel ya Nsalejetu yikwikal Diakasatu urel, pa Ndol 19. Ov antu inch akwikalaku mulong wa chisu chinech chikweta dirumburik? Mu mutapu umwing ujim, chidi kud etu. Ov wasadin kal list wa antu utongidina kutazuk—antu ilejina ney Baibel ni antu akwau in kusanger, anamakwey, antu wijikijadina nau mu kwisak, ni arund a shikol? Ov wambambin kal nau ni kuyinkish diladikij dia muchim utok? Ov ukuyivurishamu machuku makemp kurutu kwa Chivurish? Ov aswiridin ukwash wey mulong wa kushik ndond ya Chivurish? Amakurump awapidil kand kumwit muntu mwawonsu wakad kutulang rapor wa mudimu kwez. Mutapu ukwikala Chivurish urel pa dichuku dimwing dia mu rubing pa ndond pa kwisudiel kwa rubing chinech chikepishinap kujimb kwa chisu chinech chakwel awonsu eza ni kukumangan.
4 Ikal wirijekina: Chidi cha usey kudi etu kwikal irijekina ni kwikal ni yitongijok yiwamp mu manangu pa chisu tukumangena ku Chivurish. Paul wayikasikesha akaritiy nend kulam mu manangu usey wa chisu chinech. (1 Kor. 11:20-26) Ukutwish kutang mashapitre 13 kushik ku 17 ma Rusangu Ruwamp ra Yohan pa chisu cha dilejan dia Baibel dia dijuku ni kumwit muntu ni muntu mu dijuku kurumburil chirumburikina yakupesh ya Yesu kud ndiy. Kangal wavuramen kand kutang kwa Baibel kwa dichuku ni dichuku kwa rubing ra Chivurish.
5 Rukat retu mulong wa Kristu rikat kujimb, ni rijimbidinaku kand nakash pa Ndol 19. Tujijamen kumekesh rukat retu mulong wendendiy chikupu! Musambu wa Chivurish cha muvu unou ukutukwash kukasikesh chiyul chinech.