Mwom wa antu avud udi mu chak!

¹ Baibel ulejen kamu patok anch rusot ra Yehova ridi ra kwel anch “antu awonsu apanda.” Pakwez, kangal twavuramen anch mwom uchingedinau tunan twa mamiliyon ma antu pa divu wengamidin piur pa mwikadil wau kurutu kwa Yehova Nzamb ni Want wend kusutin Yesu Kristu. Mwikadil ufanyidina kud Nzamb ukutwish kwimen ching kusu pa “kwijik uyakin.” (1 Tim. 2:​3, 4) Chisu tupanina rusangu ra kwel anch katat kamu ak kurutu oku akutokish divu ni kudioshap uyimp wawonsu chakwel kutekap mangand masu ma Nzamb ma kutentam, tukat kudandamen nich mudimu wa usey utwinkinau wa kupandish mwom.​—⁠Mat. 24:14; 28:​19, 20; Rom 10:​13-15.

² Ov mulong wak kuswapej? Yesu wababesha piur pa “mar makez kwikal mayimp, kupandakan mar mamenau antu kudiokal ku disambishil dia mangand kushik ni katat.” (Mat. 24:21) Mar minam makushiken nsudiel yau ku Harmagedon. (Kuj. 16:16) Pakach pa antu avud akujiya anch alik kwitiy rusangu ruwamp, padi anamakwetu aburedina ritiy, amutej (antu tushicha nau) netu, arund netu a mudimu, arund netu a shikol, ni antu a chijikan netu. Chad chisend chetu chidi cha kuya ni kumutal “muntu mwawonsu” ni kumwilikej Nzamb, wamekesha rukat rend mulong wa antu a mangand mawonsu pa kupan Mwanend, Yesu Kristu, mud difut mulong wa antu awonsu. (Yohan 3:16) Tufanyidin nich mushiku kusal usu wa kuyitazuk antu awonsu chakwel achinyina mwi ndond ya diking ya Nzamb. Anch twasal sens mudimu wa kulejan, tukutwish kwipuk difishin dia mash.​—⁠Eze. 33:​1-7, NW; 1 Kor. 9:⁠16.

³ Ov rutong retu chom ik? Usey wa mudimu wa kulejan aukasikeshidin mu Dizu dia Nzamb. Mud kamu mwachimekeshay mupostol Paul, “rukat ra Kristu rawiy rituyikedila” chakwel kushakam kwambatan nich jinjil ja Nzamb. (2 Kor. 5:14) Chikwau kand, Tour de Garde ukat kukasikeshin yisu yivud chisend chetu cha kulejan. Mudimu Wetu wa Want chisu ni chisu upanining yiyul piur pa mutapu wa kusal mudimu wetu wa kulejan. Amakurump akat kutenchik mudimu ni kutukasikesh kuusal. Ambayetu in kulejan atwitining kubudikin nau pamwing mu mudimu. Tuteshining yiyul yivud piur pa mutapu wa kurijek mitu ya mulong ya kusambish nich misamb, mutapu wa kupan magazet ni mikand yikwau, mutapu wa kusal kuchirikinamu kusu, mutapu wa kutakel malejan ma Baibel, ni mutapu wa kusadin chisu chawonsu chimekena chakwel kupan uman. Yawonsu yiney yitukwashin mu kushiken rutong ra kupandish mwom.​—⁠1 Kor. 9:​22, 23; Efe. 1:⁠13.