Chiyukish cha Yehova chitwikadishin ampich

¹ Kutwish kwa muntu akat kukwisik yisu yivud nich kujimb kwa difut diend. Chawiy lel antu avud chimenau antu akweta nfalang mud antu amwing akweta musangar nakash. Pakwez, antu akata kutong anch nfalang jikutwish kuyiletin musangar idimbin kamu nakash. (Mul. 5:12) Kwikil musangar ukulaba kud antu “asotila kwikal ampich” mu yom ya ku mujimbu. (1 Tim. 6:⁠9) Pakwez, atushalapol a Yehova akwet chakin musangar ni adi antu amwing adia ampich nakash. (Jnsw. 10:22; Kuj. 2:⁠9) Ov mu mutapu ik?

² Uman wa dipit dietu: Tukwet jingunin wa mu spiritu upitishena ni nteshil ya Dizu dia Nzamb, Baibel. Yehova ukat kutufundish pakad kujing piur pend ni Mwanend, kusutin dirijek diend pa divu mulong wa kuwap kwetu kwa chikupu. Nteshil ya kashinsh yitutwishishin kusejin piswimp ni Yehova ni kwikal ni urund wa piswimp nakash ni ndiy. (Jak. 4:⁠8) Kujingunin kuyip ni kuwap ni kulondul yijil ya Nzamb kukat kutuking ku misong yimwing ni yak yikwau. Tuchingejin anch Yehova ukutukwash, ni chinech chikat kutuletin kusanger kwa winzamb ni chisambu cha mu manangu.​—⁠Mat. 6:⁠33.

³ Tukwet chisambu ni umwing mu dijuku dietu dia muspiritu mulong tukat kukudish mabuj ma spiritu wa Nzamb. Chitwibombina pamwing ku moj ukash wa rukat, tukatap kutong ap pakemp anch Nzamb ap akadivar netu atudjibul kal pa chisu tumena mar.​—⁠Gal. 6:⁠10.

⁴ Mwom wetu ukwet dirumburik diakin ni rutong rakin. Tuchimen mud chisend chipandakena kuwap kubudikin mu mudimu wa kulejan rusangu ruwamp kwawonsu. Kuyikwash antu akwau kwez kwandam mu urund uwamp nend Nzamb ni kusadin pamwing netu mu difukwil dishitwila kuletining musangar ukata kulab. Mudimu wetu, chipau chetu chipandakena usey, uletining kalimish kud Yehova ni kutuletin musangar wa kuwejin ku kutokish dijin diend. Tulamin mwikadil uwamp wa manangu, ni kwijik anch ruchingej retu ra machuku ma kurutu rikez kushiken.

⁵ Tumekeshany kujikitish kwetu: Tumekeshany amboku kujikitish kwetu mulong wa yiyukish ya Yehova, yitwikadishina chakin antu amwing ampich nakash pa divu. (Jnsw. 22:⁠4) Kwitekinaku chisu dichuku ni dichuku chakwel kutongin yitukweta kukat kutubachik kumujikitish Yehova mulong wa rukat rend ra kupan ni kudandamen kumwifukwil ching kusu ndiy.