Tusadinany milong yisutina katat chakwel kuvuvurish kusanger
1 Ov usotin kudandamen kwikal ni yitongijok yiwamp yikwikadisha mudimu wey wa katat ni uvuvurishina kusanger kwa antu piur pa uruu wa Baibel? Chawiy lel sadin milong yimekena mu mangand ap ndond yiushicha chakwel kusambish misamb. Ukutwish kupwitin yitongijok ku milong yimekena pol pen, mwi ngand (yen) ap mu mangand mawonsu. Yom yiney yikat kukarumukang chisu chawonsu. (1 Kor. 7:31) Shinshikin yilikej yilondwila.
2 Milong ya mutapu wa kuman nfalang ni mwikadil wa mwom ukasikena yidi milong ya kashinsh yikwetau antu. Chawiy lel, ukutwish kulond anch:
◼ “Ov wateshang rusangu anch [jimbul rusangu rin] usey wa yom wakandam kal kand?” Ap ukutwish kwisambin piur pa kuburen mudimu anch sosait umwing mujim wadioshin antu avud pa mudimu. Kulondwish ni mutapu usotina kuya kurutu nich misamb, ukutwish kudandamen nich kwipul anch “Ov wiyipulap kal mulong wak mwom ukasiken?” ap “Ov utongin anch chikwikal chisu chawonsu chikash kushakam nawamp nich difut diwamp kushik ni kwisudiel kwa ngond?”
3 Tukutwish kwisambin ubaj, mud matat mu majuku ap pakach pa an a shikol. Ukutwish kwipul anch:
◼ “Ov watangin mu jurnal anch [jimbul mulong wamekena ndond ushichany]?” Kupwa ipul anch “Ov yom ik yiletishina ubaj nakash mu mangand?” ap “Ov utongin anch kukez kwikalaku chisu chimwing tukutwisha kwov anch tudi mu diking?”
4 Jinsangu ja kwizul kwa mem masheshina yom, kunyikek kwa divu, ap kanvundangesh ka antu mu mitambu kushalijan ya mangand yiletin ni yawiy milong yivuvurishina kusanger. Chilikej, ukutwish kwipul anch:
◼ “Ov Nzamb ndiy ukweta chisend mu [jimbul chinzwij]?” Ap ukutwish kwisambin kand kanvundangesh ka antu kasadinau machuku ma kwinyim ni kulond anch: “Anch muntu mwin mwawonsu usotin chisambu, ov mulong wak chikasikena kuchishiken?”
5 Chiwapidin kwijik milong yisutina ukutwisha kusadin mu mazu mey ma kusambish nich misamb. Buku Comment Raisonner ukwet yiyul ya ukwash mu mutu wa mulong “Milong Yimekena Katat,” pa paj 9-10. Pakwez, ipuk kwisambin milong ya politik ap yimekena mu yisak. Pakwez, pwitin yitongijok ku Mifund ni kurumburil anch Want wa Nzamb wawiy mulad umwing kusu ukupwisha rawonsu milong yikwetau antu.