Kulejan mu Mangand Mamwing Madandamedina Kukarumok
1 Yom yikutwish kukarumuk swa mud ik! Kapamp kamwing pakad kuchingejin, kusheshik kudiokila ku chitangil, mwikadil wa kuburen kwa nfalang, kanvundangesh ka chipolitik, ap chinship chijim cha kusheshik chijikena kud antu awonsu yikutwish kwikal mutu wa mulong wa kwisambin. Pakwez, chiswapel mud ik anch antu atwisha kukarumwin yitongijok yau ndond yikwau. (Mid. 17:21; 1 Kor. 7:31) Mu mangand minam madandamedina kukarumok, ov mutapu ik tukutwisha kukwat yitongijok ya antu chakwel kuyilej rusangu ra Want?
2 Tujinguninany Yakamish ya Antu Akwau: Mutapu umwing wa kukwat yitongijok ya antu udi kusutil ku kujimbul yinship yisadikina katat. Chakwel kuyikasikesh antu adinga ni kumutesh kutongijokin nakash piur pa mwikadil wau kurutu kwa Nzamb, dichuku dimwing Yesu wajimbula kusheshik kwa katat kwadinga mu manangu mau. (Luka 13:1-5) Chilik chimwing, chisu tupanina rusangu ruwamp, tuwapidil kwisambin jinsangu jisu ap milong yabudikidina ndond tushicha yikwatina mwom wa antu a mu teritwar wetu. Pakwez, anch tukat kwambambin milong ya mutapu winou, tufanyidin kubabal chakwel kangal twitek ku mutambu umwing ap ukwau piur pa milong ya chipolitik ap ya chisak.—Yohan 17:16.
3 Ov mutapu ik tukutwisha kwijik yom yitonginau antu katat? Pamwing ap mutapu uwamp wa kwijik udi kusu wa kwipul chipul ni kupwa kutesh. (Mat. 12:34) Kuyisanger antu kukez kutubachik kutesh yitongijok ya antu akwau ni kuwejinaku kwipul nich manangu. Kulond kulondilay mwin chikumbu kapamp kamwing kukutwish kumekesh patok milong yiyikwatina antu avud mu teritwar ni kukutwish kwazuril njil ya kupan uman.
4 Turijekany Mazu ma Kusambish Nich Minsamb: Chisu twirijekina mulong wa mudimu wa chingand mu mangand mamwing madandamedina kukarumok, tukutwish kusadin buku Comment Raisonner. Yiyul ya ukwash piur pa mutapu wa kwandjik jinsangu ja katat mu mazu metu ma kusambish nich minsamb jidi pa paj wa 10-11, mwishin mwa “Wimpongarik/Diking” ni “Yinship ya Katat.” Tukutwish kutan jinsangu ja chilik chimwing mu Mudimu Wetu wa Want wa Mwinses 2000, pa paj wa 8. Chisu urijekina mazu mey ma kusambish nich minsamb, shinshikin nawamp chakwel kwandjikamu mufund wa Baibel ufanyidina.
5 Anch tukat kuta muchim ku maswir makarumokina ma antu a mu teritwar wetu, tufanyidin kwambatanish mazu metu ma kusambish ma kupan nich rusangu ruwamp nich maswir ma antu. Mwi njil yiney, tukat kwambamb ni antu piur pa yom yidia mu michim yau. Chawiy lel, tukat kuyikwash antu avud kushiken kumwijik Muntu wakad kukarumukang mu ngikadil yend ni mu yijil yend.—Jak. 1:17.