Mutapu wa kuyitiyish akwau
1 Mupostol Paul wading wijiken mud kashalapol umwing mwin kwitiyish. (Mid. 19:26) Ap Mwant Agripa wamwipula anch: ‘Ey ukat kusot kwingikadish am kwikal mwin Kristu, kwashal kal kachisu kakemp kusu.’ (Mid. 26:28) Ov chom ik chikadisha mudimu wa Paul wa kwitiyish nakash? Wadinga ni kutongin nawamp kusutin Mifund, ni kwisikesh mazu mend ni antu adinga ni kumutesh.—Mid. 28:23.
2 Mud Paul, niyetu tufanyidin kwikal in kwitiyish mu mudimu wetu wa kulejan. Ov mutapu ik? Chifanyidin kusadil manangu pitwambambina ni kuyitesh antu akwau. (Jinsw. 16:23) Kudi jinzau jisatu ja usey jikutukwasha kusal chinech.
3 Tuteshany nawamp: Anch muntu mukwau ukakulond, tesh nawamp mulong wa kuman pakovijadin nend chakwel kudandamen nich misamb. Anch walangwish chikangesh kanang, pakish kujingunin mulong wak. Chikwikal cha ukwash kwijik nawamp yitiyij yend, chiyitiyidinay, ni chom ik chamubachikina kuyitiy. (Jinsw. 18:13) Tukutwish kumwipulay nich manangu.
4 Twipulany yipul: Anch muntu walond anch witiyidin mafundish ma Usatu, ukutwish kumwipul anch: “Ov witiyidining machuku mawonsu mafundish ma Usatu?” Ni kuwejinaku anch: “Ov washinshikinap kal piswimp nakash yilondila Baibel piur pa mutu wa mulong winou?” Ukutwish kand kumwipul anch: “Anch Nzamb udi chikunku cha Usatu, ov twelangap kuchingejin anch Baibel achilejana patok?” Yakul ya muntu wisambinany nend yikukukwash kutongin nend pamwing piur pa yom yilondina Mifund.
5 Tusadilany yitongijok yovikena: Dichuku dimwing, kaman umwing wamwipula mband umwing wading witiyidina anch Yesu udi Nzamb: ‘Anch wadi ufanyidin kurumburil anch antu aad adi chilik chimwing, ov kuvarikan ik ukutwisha kusadil mud chilikej?’ Mband wakula anch: “Nikutwish kusadil chilikej cha akadivar aad.” Mukadivar wawejinaku anch: “Chitwishikin kulondin ap ampamb. Pakwez chom ik chifundishinay Yesu, patulejinay kumuman Nzamb mud Tatuku ni ndiy amwinend mud Mwan?” Mband watesha anch umwing udi mukurump kud mukwau ni ukwet usu kupandakan. (Mat. 20:23; Yoh. 14:28; 20:17) Manangu mend ni muchim wend ayishika nich mutapu winou wa kwitiyish.
6 Chakin, kadiap antu awonsu akata kwitiy uyakin, wikalap nchik mutapu wetu uwamp ni ufanyidina wa kusambish nich misamb. Pakwez, mud Paul, twikalany ni mushiku wa kusot antu a kashinsh mu mwab wetu, ni tuyitiyishany uruu wa Want.—Mid. 19:8.