“Kudi Nzamb yom yawonsu yikasikenip”
1 Mudimu wa kusambish wa chikumangen cha Ukristu udi wa kulejan uruu wa Want pa mangand mawonsu. (Mat. 24:14) Winou udi mudimu ujim nakash. Kud antu avud akata kushinshikin mudimu wetu, chimeken mud chifanyidin kwikal nich mapit mavud kusut mitukweta. Kud antu akwau, chitwishikinap kuwanyish nawamp mudimu winou mulong tudi antu akatau kupipej, kupompat, ni kuzengol. (Mat. 24:9; 2 Tim. 3:12) Antu in kwidjidjek itiyin anch mudimu winou udi chom chimwing chikasikena kuwanyish. Pakwez, Yesu walonda anch: “Kudi Nzamb yom yawonsu yikasikenip.”—Mat. 19:26.
2 Yilikej Yiwamp ya Kulondul: Yesu wasambisha mudimu wend mud muntu umwing udia chinyim ni ditenchik diakabuj dia yom. Chakwel kumukangesh kutwish mudimu wend, in kumupompat amwela yom yawonsu ukutwisha kutongin yakad kalimish, kupwa amujipa nich rufu rimwing risansena nakash. Pakwez, kwisudiel, Yesu walonda nich ruchingej anch: “Am napandikan kal mangand.” (Yoh 16:33, Testament Musu ni Kuseng) Chakin kamu kuwanyish kumwing kujim nakash!
3 In kwilej a Yesu amekesha kujijaman kwa mutapu umwing ni mushiku mu mudimu wa Ukristu. Avud ayibula nich misel, kubul kujip, ayikasa ni kuyitek mu rukan, ni kuyijip. Chikalap nchik mwamu, awiy ‘asangara chakwel ayichindila pakach pa antu afanyidina kukwatish usany mulong wa dijin diend.’ (Mid. 5:41) Nich kuying kwa pa chipatu, awiy awanyisha mudimu wadinga ni kumekan mud ukash, mudimu wa kulejan rusangu ruwamp “djat ni kusudiedila mangand.”—Mid. 1:8; Kol. 1:23.
4 Mutapu wa Kutwish pa Chirung Chetu: Tufanyidin niyetu kand kwikal ni mushiku wa kuyish kurutu mudimu wa kulejan Want kwikalap nchik yimekena mud yikangesh yikash. Kwikalap nchik kukangesh, kuzengol, rukan, ni yipimik yikwau ya chisum mulong wa kutwimik, tukat kupandikan. Ov mutapu ik chitwishikina? “ ‘Chidiap ku usu wa amasalay, ap ku dikand dia muntu, pakwez ku spiritu wam,’ chilondilay Yehova mwin yisak.” (Zak. 4:6, NW) Nich ukwash wa Yehova, kwikil chom ap chimwing chikutwisha kukangesh mudimu wetu!—Rom 8:31.
5 Pitukata kulejan, tukwetap mulong wa kuzal ap kwov wom nakash ap kwiyov mud tufanyidinap. (2 Kor. 2:16, 17) Tukwet usu upandikena ukutwisha kutubachik kuya kurutu mu kupalangesh rusangu ruwamp ra Want. Nich ukwash wa Yehova, tukez kuwanyish “yikasikena”!—Luka 18:27.