Babalany Chakwel Kuyitan Atujikamatu mu Teritwar Wen
1 Yehova ukat kutwa rubil anch: “ ‘Ez!’ . . . Chifanyidin muntu mwawonsu ukatila mem ma mwom eza, amatambul mamwamu wakad kuland.” (Kuj. 22:17) Kudi atujikamatu avud nakash pakach pa antu itiyina ku rubil riner. Mud chibudikin, mu mivu 13 yasutina ey, kwasadikin yikumangen ya rudim ra yijingidij 27 ni yirund 43 ya mu rudim ra yijingidij mu mutiy wa États-Unis.
2 Ap anch yikumangen ni yirund ya mu rudim ra yijingidij yikat kukungin usu way wawonsu wa kulejanang padi atujikamatu ni antu ateshininga chikasikena adia mu materitwar mau, kuchidi kand antu avud mud inay achidia kand kal ayitana ni kuyiletin uman mwi ngand yiney.
3 Ov Mutapu ik Ukutwisha Kuyikwash? Pa chisu chiudia mu jindond ja pibur, ov wamenap kal antu asadidila rudim ra yijingidij? Ov wijaku muntu kanang ndond yiukata kusadil mudimu ap ku shikol yen ukweta mwanamakwend kajikamatu? Babalany chakwel kuyitan atujikamatu piusadila mijikit yey ya dichuku ni dichuku. Pakwez mutapu ik ukutwishanya kwijik anch akwitiy uman wa Want?
4 Pan Uman: Ijikish chikumangen cha rudim ra yijingidij ap chirund chidia piswimp ni ndond yishichay kajikamatu. Atujikamatu avud akat kuyang kurutu mu kwilej uyakin chisu chitwishinau kukumangan nau Atuman adia atujikamatu ku yikumangan ya chikumangen chisadinau mu rudim ra yijingidij ra in Amerik. Chawiy lel, anch kudi chikumangen ap chirund cha rudim ra yijingidij mu ul wen, chifanyidin kumwijikish kalam’a ujindj wa chikumangen chen kurutu kwa chisu piur pa atujikamatu awonsu adia mu teritwar wen.
5 Ov ukusal nchik anch kwikil muntu ap umwing udia piswimp ukutwisha kupan ukwash wa muspiritu kud atujikamatu adia mu ul wen? Ov mutapu ik ukutwisha kuyikwash? Ov mulong wak ukutwishap kuchirik kumutal ni kwambamb ni yid yawonsu yikata kutesh ya ku chikumbu chau? Pakish kumekesh band video wa rudim ra yijingidij chakwel kulangwish kusanger kwa muntu udia kajikamatu. In kulejan amwing ileja rudim ra yijingidij chakwel kutwish kushik ku michim ya atujikamatu avud nakash. (Midimu 16:9, 10) Broshir Nzamb Witin Etu Tusal Ik? ni buku Connaissance yidiaku kal mu rudim ra yijingidij ra in Amerik mu maband video. In kutakel malejan ma Baibel akata kusadilang yom yiney ya mudimu akat kwangulang kamu chisu chawonsu yibudikin yivud yiwamp.
6 Anch wababal chakwel kutan atujikamatu mu teritwar wen, ukutwish kuyinkish chisu cha kutambul mem ma mwom mamwamu wakad kuland.—Mat. 10:11.