Kurutu kwa Kuya mu Mudimu wa Kulejan, Ufanyidin Kukimbijol Antu Alondina Rudim Rindjing
1. Ov, mulong wak akatwiling materitwar ma chikumangen madia mu jindond mudia jindim jivud kulondwish nich rudim?
1 Pa Pentekot wa muvu wa 33 C.C., kupwa kwa kutambul mwiku utumbila, atwimbuy a Yesu “asambisha kulond mu jindim ja michid yikwau” kudi antu adinga pinipa adiokala mu materitwar madinga kulemp ma pa mangand. (Mid. 2:4) Mudi chibudikin, kwading antu piswimp 3000 ababatishau. Chisangareshina chidi anch, chimeken pamwing ap anch angendj avud alonda kand niyawiy rudim rimwing, mudi Hebereu ap Grek. Chikwau kand Yehova wasota chakwel uruu wa Want aulejana kudi antu inay mu rudim rau ra chivadik. Chakin kamu diyingish dimwing pa mulong winou didi anch yisu yivud antu itiyijining ku rusangu ruwamp pakad kulab chisu chiteshiningau rusangu riner mu rudim rau ra chivadik. Chawiy lel, nlel unou materitwar ma chikumangen madia mu jindond mudia jindim jivud amakatwiling kulondwish nich rudim. (Atenchikinau, pa paj wa 107, par. 2-3) Yisak yilondininga rudim ra wingendj yikutwishap kwikal ni teritwar kanang, pakwez yilejening kudi antu alondininga rudim mu chikumangen chijikena anch chawiy chikwashina chisak cha rudim ra wingendj ni yikumangen yikwau yiyinyingumukina.
2. (a) Ov, mudimu wa kuyikimb antu chom ik, ni ndond ik yikutwisha kwikal ya usey? (b) Ov, mutapu ik yikumangen yikutwisha kumukwash muntu umwing ni mukwau mu mudimu wa kulejan mu teritwar wa jindim jivud? (c) Ov, chom tufanyidina kusal anch twatan muntu kanang ulondina rudim rikwau umekeshina musangar?
2 Anch ushichany mwi ndond mudia muntu mwawonsu ulondininga rudim rimwing, ukutwishany kulejan mu mutapu uswapela ku chikumbu ni chikumbu. Pakwez, mwikadil wen ukutwish kushalijan anch ushichany mu misumb yijim mudia antu alondininga jindim jivud. Yikumangen ya rudim rikwau yikutwish kulejan mu mwab mulondinau rudim riner. Chisu chikutwisha chikumangen kukwijikish piur pa antu atanau alondininga rudim rey, chisend chey cha kusambish chidi cha kuyitan antu inay ukutwisha kuyilej pamwing ni chikumangen chey ap chisak. (Tal mushet “Kwashijanany Umwing ni Mukwau.”) Chawiy lel, ukutwish kwiyandjik mu mudimu wa kukimbijol ndond yiufanyidina kutan antu alondininga rudim ra pakampwil. Ov, mutapu ik ukutwisha kusadik mudimu wa kuyikimb antu?
3. Ov, chom ik chikutwish kukwash chikumangen ap chisak chakwel chijika ndond ya kukimbijol antu ap yisu yifanyidinau kusutil mu mudimu winou?
3 Kutenchik Mudimu wa Kukimbijol: Chisu cha kwipan mu mudimu wa kukimbijol antu mu materitwar mulondinau jindim jivud chimedidining pa mashakamin ma pol pen. Chilakej, antu inch adia mu mwab umwing alondininga rudim? Ov, in kulejan inch adia mu mwab winou? Ov, uvud ik wa maadres ma antu inay madiaku kal mu chikumangen ap mu chisak? Chikumangen kachitinap chikimba teritwar wach, pakwez chikutwish kutond chakwel chishinshikina jindond jikweta antu avud mu mimbu yach ni kushinshikin materitwar mamekena anch madi kulemp. Chawiy kutenchik program muwamp wa kukimbijol antu kudi kwa usey mulong anch chitwishikin kukutwish kwayinkish antu chisu cha kutazuk pa dijin dia Yehova.—Rom 10:13, 14.
4. (a) Ov, mutapu ik ufanyidinau kutenchik mudimu wa kukimbijol antu? (b) Ov, mitapu ik yimwing ya kutan antu alondininga rudim rey?
4 Mulong wa kwipuk kukimbijol antu pakad kusal mausu mavud mu jindond jidiau, chidi cha usey chisak cha amakurump pakampwil kalam wa mudimu atenchika ni atakela mudimu wa kukimbijol antu. (1 Kor. 9:26) Mu yisak yilondiningau rudim ra wingendj, mukadivar chifuvu pakampwil mukurump ap nkwash wa mudimu watondau ku chisak cha amakurump chikwashina chisak chidia mwishin wa umutakel wach, ndiy ukutwish kutakel chisak chinech. Yikumangen yivud ni yisak yikweting program wa pakampwil wa kusambish kusal mudimu wa kukimbijol antu, pamwing ap asadidining umutakel ap Internet chakwel ajingunina majim mamwing ma rudim riner. Kupwa mudimu wa kukimbijol antu ukusadik kusutil ku kumutazuk muntu ap kumwendil mulong wa kujingunin maadres mafanyidina kuwejinaku mu teritwar. Anch chitwishikin kusal mwamu, chisak cha amakurump cha chikumangen chikwashina chisak chinech chikutwish kutenchik program chakwel chikumangen cha kabuj chisala yisu yimwing mu mudimu winou wa kukimbijol antu.—Tal mushet “Mutapu wa Kutan Antu Alondininga Rudim Rey.”
5. (a) Ov, yiyul ik yimwing yikutwishau kusadil kudi in kulejan mu mudimu wa kukimbijol antu? (b) Ov, mutapu ik tukutwisha kulond kudi antu chisu tuyikimbina?
5 Tufanyidin kwikal ni rutong ruwamp chisu ni chisu twipanina pakampwil mu mudimu wa kukimbijol antu. Mulong mujikit winou udi chikunku cha mudimu wa kulejan, tufanyidin yisu yivud kudjal nawamp mudi atushalapol. Antu avud amening anch kusadil mitapu yiney ni kulond rudim rau chisu chisadinau mudimu wa kukimbijol kuyikwashining kulam musangar ni kulond nawamp rudim rau nich ukaliweny. Tukutwish kuchind chisu tusutishina mu mudimu wa kukimbijol antu pakad kuchind chisu turijekininga makart ma teritwar ni malist. Chisu tukutana muntu kanang ulondina rudim, tufanyidin kusal usu wa kumulej rusangu ruwamp ni kupwa tukumwijikish kalam wa mudimu pakad kulab ap muntu umwing watondau chakwel mapaper ma kufundin jinsangu ja teritwar mikalaku. Chikalap nchik musangar ukumekeshay muntu. Ap anch mudimu wa kukimbijol antu udi wa usey, tufanyidin kwikal isikena ni kwipan mu milad yawonsu ya mudimu wa kulejan.—Tal mushet “Mutapu wa Kulond mu Mudimu wa Kukimbijol Antu.”
6. Ov, mudimu wa kukimbijol atujikamatu ukweting yikokujol ik ya pakampwil?
6 Kukimbijol Atujikamatu: Mudimu wa kukimbijol atujikamatu ukweting yikokujol ya pakampwil ni witining usu ukash ni kujijaman. Muntu kajikamatu ukasikening kumwijik kusutil ku kutazuk dijin diend, ku ngikadil yend ya kumujimbu, ap ku mutapu wend wa kudjal. Chikwau kand, yid ya dijuku ni arund nend kakutwishap kumumekesh patok ni akutwish kwidjidjek chakwel apana jinsangu kudi in kulejan itina kwijik piur pend. Yiyul yilondwilaku piur pa kukimbijol muntu kajikamatu yikutwish kand kwikal ya ukwash chisu cha kukimbijol antu asadidininga rudim ra yijingidij.
7. (a) Ov, yom ik yitinau kusal mwin ndond yidia atujikamatu chakwel tuyitan? (b) Ov, mutapu tufanyidina kusal chakwel tudiosha chitongijok chiyimp chidia nich mwin chikumbu?
7 Yikumangen ni yisak ya mu rudim ra yijingidij yitwishining anch yikala mwi ndond yiniya yidiau atujikamatu. Pamwing ap mwin chikumbu ukukulej mutej, mbay wa mudimu, ap mbay wa shikol usadidininga rudim ra yijingidij. Ukutwish wakulej chijingidij cha mu mukombil chilejena amutej anch an adia atujikamatu adiaku. Pamwing ap ukutwish kwikal ni mwanamakwend kajikamatu. Lam mu manangu anch rutong rey ra kumwendil akutwish kuriman nich chitongijok chiyimp. Pakwez, ukutwish kusal usu wa kukepish wom wa mwin chikumbu kusutil ku urund wey wakin ni kulond mu wiswimp nich kashinsh, ni kurumburil mu mutapu wa kalimish. Antu amwing atana yibudikin yiwamp kusutil kusadil yijingidij ya Bibil ap DVD wa yijingidij pamwipwilingau mwin chikumbu anch wij muntu kanang udia kajikamatu. Kupwa alondin mu wiswimp anch asotin kulejan ruchingej ra mu Bibil pamwing ni atujikamatu. Anch mwin chikumbu widjidjekin kupan jinsangu, ukutwish kwitiy adres wey ap diladikij dia kukumangan ku chikumangen chakwel amwinkisha mwanamakwend ap murund nend udia kajikamatu.
8. Ov, mutapu ik ukutwisha chikumangen cha piswimp kukwash chikumangen cha rudim ra yijingidij?
8 Kapamp kamwing ap tupamp twaad pa muvu, chikumangen cha rudim ra yijingidij chikutwish kutazuk chikumangen chidia piswimp chikweta rudim rikwau chakwel chiyikwasha kukimbijol misumb yijim yidia mu teritwar wau mujim. Pa chisu cha chikumangan cha mudimu chisadikina mu rudim ra yijingidij akutwish kuwejinamu yany yitadina mujikit winou ni chakumenaku. Akutwish kwinkish chisak ni chisak in kulejan akemp adia mu chikumangen cha rudim ra yijingidij ni kuyinkish kand kart ulejena ndond ya pakampwil ya kusal mudimu wa kukimbijol antu.
9. Ov, mutapu ik ukutwisha mudimu wa kukimbijol antu kusadik ndond yidia ya antu atujikamatu inungina pamwing ni kwipuwangesh ap kutambul midimu ya ukwash?
9 Mudimu wa kukimbijol antu ukutwish kand kusadik kwindond yidia antu atujikamatu ija kwinung pamwing ni kwipuwangej ap kutambul midimu ya ukwash yipaninau kudi chisak cha ukwash. In kulejan afanyidin kudjal kwambatan nich mashakamin ma ndond jidiau. Chikutwish kwikal chiwamp kwisamb ni kajikamatu umwing ap aad adiapu ni kwikal mwin kusadil jinkeu pa ndond pa kupan uman mu chisak chakabuj cha atujikamatu. Anch minsamb yisongin mabuj, pamwing ap ukutwishany kwambambany nawamp.
10. Ov, mutapu ukutwishau in kulejan kukimbijol antu adia mwi ndond ya in kwisakin?
10 Chitongijok chikwau chidi cha kurijek makart malejana ndond ya in kwisak a pol pen ni kupwa kuyendil pa chisu chiwanyidin. Kart umwing akutwisha kufundap uvud wa ndond yilandishiningau kasarony. Kart mukwau akutwish kufundap ndond ya kwowishin maswin, marestorant, mahotel, ap mitapu yikwau ya kwisakin. Anch kart ni kart ukwet mitapu yimwing ya kwisakin, in kulejan akutwish kusadil kart umwing ni kutaninamu uman ni mushiku. Chilakej, anch yisu yivud ku mahotel akiningaku in kuland adia atujikamatu, tukutwish kurumburil mu wiswimp mudimu wetu kudi mwin kulandish ku hotel ni kumwinkish DVD warijekau kal ni diladikij dia kukumangan ku chikumangen chakwel ayinkisha angendj atujikamatu adia ku hotel winou. Kwindond yikwau ya in kwisakin tukutwish kwipul kusu kudi in mudimu ap ant a mudimu anch asadidining rudim ra yijingidij. Anch kudi shikol ya atujikamatu mu teritwar, tukutwish kupan mamwing ma ku DVD metu.
11. Ov, mulong wak mudimu wa kukimbijol antu udi chikunku cha usey cha mudimu wa kulejan?
11 Mudimu wa Usey: Kutan in chikumbu alondininga rudim rey ukutwish kwikal mudimu uziyishininga. Chikwau kand, mikadil ya antu adia mu mwab kanang yikutwish yaswimp swa pashemunikiningau ni kuya kwindond yindjing, chiding chikokujol cha kutenchik kwangan materitwar ni kulam madoshe makweta jinsangu ja katat. Chikalap nchik mwamu, mu jindond jivud, mudimu wa kukimbijol antu uding mulad wa usey wa mudimu wa kulejan. Yehova, watwinkisha chisend cha kusal mu mudimu wa kulejan kakwetap kasolikany pakach pa antu bwat. (Mid. 10:34) Rusot rend ridi anch “antu awonsu apanda ni kwijik uyakin.” (1 Tim. 2:3, 4) Chawiy lel, tukutwish kusal pamwing ni Yehova ni muntu umwing ni mukwau chakwel kuyitan antu alondininga jindim jawonsu akweta ‘michim yiwamp ya kuziyil.’—Luka 8:15.
[Kamushet kadia pa paj wa 5]
Kwashijanany Umwing ni Mukwau
Anch chikumangen ap chisak chiswiridin kupan ukwash wa kutan antu alondininga rudim rau chakwel ayileja, kalam wa mudimu ukutwish kuya kwambamb ni amakurump a yikumangen yilondininga rudim rikwau yidia piswimp. Chikwikal chiwamp kuya kwambamb ching kusu ni yikumangen yimekena anch yidiap kulemp ap yikwet uvud kanang wa antu alondininga rudim. Yikumangen yendidilau yikutwish kuyijikish in kulejan au anch: Anch atan antu kanang alondininga rudim riner, afanyidin kufund maadres mau ni kumapan kudi kalam wa mudimu chakwel aya mu chikumangen ap mu chisak chiswiridina ukwash. Atulam a mudimu a yikumangen itinau kusal mudimu winou akutwish kutenchik pamwing program wa kuwanyish teritwar ukweta jindim jivud ni kutakel antu amekeshina musangar ku chikumangen chiwanyidina ap mu chisak.
Anch in kulejan atan muntu kanang ulondina rudim rikwau umekeshin musangar wakin (ap muntu kanang udia kajikamatu), afanyidin kwizwish kapamp kamwing fomu Veuillez suivre l’intérêt (S-43) ni kumupan kudi Kalam wa ujindj wa chikumangen. Chinech chikutwish kumukwash muntu atambula swa ukwash wa muspiritu.—Tal km 5/11 pa paj wa 3.
[Kamushet kadia pa paj wa 6]
Mutapu wa Kutan Antu Alondininga Rudim Rey
• Ita antu akwau—in kwilej Bibil, yid ya dijuku, ambay a mudimu, ni yikwau.
• Sadil list udia ni manimero ma telefon chakwel utana majim ma chilik chimwing ma rudim. Kukimb list utekina manimero ma antu kushalijan kwambatan ni maadres kukutwish kwasadik pa Internet ap kusutil ku sosait wa telefon.
• It nich kudimuk ndond yipaniningau midimu kudi antu awonsu, mudi mabibiliyotek ma pol pen, mabiro ma mburamatad ni ku mashikol.
• Tal jurnal wa pol pen wa jinsangu jengamidina pa mijikit ya antu awonsu kusutil ku chisak chijim cha antu alondininga rudim rindjing.
• Endil makashing ma pol pen ni ndond ya in kwisak yitekina yisak yijim pamwing alondininga rudim rindjing.
• Anch ukwet mbil, ukutwish kushakam ndond yidia in kwisakin, ndond yidia in kwilej shikol ya piur ap ndond ya kukandamin motak yezininga chisu chawonsu antu ija kulond rudim rindjing.
• Anch achitiyijin kudi mbil ya mburamatad wa mwingand yen, ukutwish kukimbijol majin ma antu asadininga mudimu wa kwisak ap program wa ku ordinater chakwel utana ndond pa Internet ya antu alondininga rudim rindjing.
[Kamushet kadia pa paj wa 7]
Mutapu wa Kulond mu Mudimu wa Kukimbijol Antu
Mudi murund, kumushejin muntu mu mutapu uwamp ni kwa kashinsh kukez kudiosh chitongijok chiyimp. Yisu yivud chidi cha ukwash kusambish ni kumekesh mikand ya mu rudim rindjing.
Kupwa kwa kumulangwish muntu, ukutwish walonda anch: “Ov, kwisu umena antu alondininga rudim ra ______ chakwel twisambanau pamwing ruchingej ridia mu Bibil. Ov, wij muntu kanang tukutwisha kwisamb nend?”
Chisu umukibina muntu udia kajikamatu, ukutwish kulond anch: “Walankany. Ov, usotin nikuleja chom kanang? [Sadil video wa kusedil ku makas wa atujikamatu anch umukwet, mekesh verse wa Traduction du monde nouveau—udia pa DVD.] chikunku chinech chidi cha Bibil cha Rudim ra Yijingidij ra in Amerik. Chikwau kand, tukwet mavideo mavud madiaku makad kukwat madiaku mulong wa kuwanyish maswir ma muspiritu ma atujikamatu. Ov, wij muntu kanang udia kajikamatu ap wakad kutesh nawamp ni usadidining rudim ra yijingidij?” Anch mwin chikumbu kavurikinap muntu ap umwing, yisu yivud chiwapin kupan yilakej ya ndond yamanay muntu udia kajikamatu, mudi ku mudimu, ku shikol ap mwindond yidiay.