Tuchingejinany Usu wa Yehova
1 Tukwet yiyingish yivud ya kwengamin padi Yehova. Kulejan rusangu ruwamp “ku mangand mawonsu” udi mudimu umwing witina ukash. (Mat. 24:14) Chisu ni chisu, tukat kurish nich mujimbu wetu wakad kuwanyin. (Rom. 7:21-23) Chikwau kand, ‘tukat kurish . . . nau [in ulabu] ayikedila pa mangand minam mu chirung chinech cha mididim.’ (Efe. 6:11, 12) Chakin kamu, tukwet kuswir kwa ukwash. Ov mutapu ik lel tukutwisha kutambul usu wa Yehova?
2 Kusutil Dilembil: Yehova ukat kupan nich rukat spiritu wend utumbila kud atushalapol end akata kumwit. (Luka 11:13) Ov uburedin ruchingej mu ukaliweny wey wa kulejan ku chikumbu ni chikumbu, mu balibal, ap kusutil ku telefon? Ov kuburen kuzangurok kwey kukukangeshin kupan uman wa kukashimun? Ov kuburen kusanger kwa antu adia mu teritwar wen kukat kukepish mushiku wey? Ov ukusal nchik anch kudi yipwichik yitekina mu chak ritiy rey ap kushinshaman kwey? Chingejin padiay Yehova. Lembil chakwel utambula usu.— Filp. 4:13.
3 Kusutil Dilejan dia Muntu Ipend: Mud kamu chitukata kutan usu ku kudia yakudia ya ku mujimbu, chawiy kamu chimwing atukasikeshin muspiritu nich kwidishil chisu chin chawonsu mu Dizu dia Nzamb ni mu mikand ya “kashalapol wakin ukweta manangu.” (Mat. 4:4; 24:45) Chisu chamwipulau Stanley Jones, anch chom ik chamwinkisha usu wa kujijaman mivu yivud ya kwishakamin pa rend mu rukan mu Chine pakad kwikal ap ni Baibel, ndiy wakula anch: “Tukutwish kujijaman mu ritiy. Chakin, cha kusambish tufanyidin kwilej. Tukutwishap kwikal nich usu wa mukach anch tukatap kwilej Baibel.”
4 Kusutil Kukumangan ku Yikumangan: Mu mivu chitot ya kusambish, pa chisu cha yikumangan ya Ukristu, Yuda nend Silas “ayidimwisha akadivar nich mazu mavud ni kuyikasikesh.” (Midimu 15:32) Chilik chimwing nlel unou, yitukata kutesh ku yikumangan yikat kujimbish kujikitish kwetu kud Yehova, kutung ritiy retu, ni kutukasikesh mulong wa mudimu. Yikumangen yikat kutukwash chisu chin chawonsu kwikal mu umwing nau “ambay netu a mudimu wa want wa Nzamb” adia “ukwash ukata kulet usu.”—Kol. 4:11, NW.
5 Tuswiridin kand ukwash mu “machuku minam ma mar nakash.” (2Tim. 3:1) Piur pa antu akata kutambul usu udiokila kud Yehova, tuchingejin anch: “Awiy akez kuzambuk nich jimpur mud ja mbur. Akez kukadab mau ni kakezap kuziy; akez kwend ni kakezap kuziy.”—Isa. 40:31, NW.