“Ndiy Ukat Kupan Usu Kudi Uziyina”
1 Tuziyiling etu awonsu pa yisu yimwing. Kuziy kudiokilingap ching kusu ku mudimu ap ku kwiyijidish kwa mujimbu pakwez kukutwish kudiokal kand ku milong yiturishina nich mu “machuku [minam] ma kwisudiel . . . ma mar nakash.” (2 Tim. 3:1, Manswik Masu) Mudi atushalapol a Yehova, tukutan nchik usu wa mu spiritu uswiridina chakwel kangal twaziy mu mudimu wetu wa kulejan? Tukat kutan usu kusutil kumuchingejin Yehova ukweta “ukash wend ujim”. (Is. 40:26) Ndiy wij maswir metu ni usotil chakin kamu kutukwash.—1 Pi. 5:7.
2 Yitenchik ya Yehova: Yehova utukasikeshining kusutil ku spiritu wend utumbila, wawiy usu ukash wasadilay pa kutang mangand. Spiritu wa Nzamb ukat ‘kutupizurish usu’ anch twaziy. (Is. 40:31) Iyipula amwiney anch: ‘Ov, kapamp ik kansudiel nalembila pakampwil chakwel spiritu utumbila ankasikesha chakwel niwanyisha yisend yam ya Ukristu?’—Luka 11:11-13.
3 Kusutil ku kutang ni kutongijokin pa Dizu dia Nzamb dipepidilau dichuku ni dichuku ni kudia mu spiritu kusutil ku kwilej pakad kujing mikand yetu ya win Kristu, tukez kwikal akash mudi “mutond ukunyinau kuns kwa mem, ukat kusong mabuj mu chirung chau, mayij mau kand kimakulipangip.”—Kus. 1:2, 3.
4 Yehova ukat kuyisadil kand ambay akaritiy, chakwel ‘atukasikesha’. (Kol. 4:10, 11) Atukasikeshining ku yikumangan ya yikumangen kusutil ku mambamb, yirumburil, ni minsamb yau yitungina. (Midimu 15:32) Amakurump in Kristu, atwinkishining ukwash mu spiritu ni dikasikesh dia usu mu mutapu wa pakampwil.—Is. 32:1, 2.
5 Mudimu wa Kulejan: Anch wiyov ang wasambish kal kuziy, kangal walik kulejan! Chinyim nich mijikit yikwau, chakin kusal mudimu wa kulejan pakad kujing mu kutukasikeshining. (Mat. 11:28-30) Kulejan rusangu ruwamp kutukwashin kushinshikin pa Want wa Nzamb ni kulam mu manangu uchikupu ni yakushilamu yend yamushena.
6 Kuchidi yom yivud ya kusal kurutu kwa kusheshik kwa ditenchik dined diyimp. Tukwet diyingish dia kushinshaman mu mudimu wetu, ‘nich usu utwinkishinau kudi Nzamb.’ (1 Pi. 4:11) Tukez kupwish mudimu wetu nich ukwash wa Yehova, mulong “ndiy ukat kupan usu kudi uziyina.”—Is. 40:29.