‘Adishinau Nich Mazu ma Ritiy’
1 Kulondul mwom wa kwipan kud Nzamb kwitining kwikasikesh nakash. (1 Tim. 4:7-10) Ku usu wetu ayinetu, tukutwish kuziy pakad kulab ni kwipwakal mu kupakish kwetu kulondul njil mud yiney. (Is. 40:29-31) Mutapu umwing tukutwisha kutambul usu udiokila kudiay Yehova udi kusutil kwikal ‘adishinau nich mazu ma ritiy.’ —1 Tim. 4:6.
2 Yakudia Yivud ya Muspiritu: Kusutil ku Dizu diend ni kud “Kashalapol ushishamena ni kubabal,” Yehova ukat kupan yakudia yivud ya muspiritu. (Mat. 24:45) Ov tukat kusal usu chakwel kutaninamu? Ov tukat kutang Bibil dichuku ni dichuku? Ov twitekidin kal chisu mulong wa dilejan dia muntu ipend ni kutongijokin? (Kus. 1:2, 3) Kudia kuwamp kwa muspiritu mud kwinoku kukutukasikesh ni kutuchidij ku yom yiyimp ya mangand ma Satan. (1 Yoh. 5:19) Anch twizwish manangu metu nich yom yiwamp ni kuyisadil mu mwom wetu, Yehova ukwikal netu.—Filp. 4:8, 9.
3 Yehova ukat kutukasikesh kand kusutil ku yikumangan ya chikumangen. (Heb. 10:24, 25) Mafundish ma muspiritu ni urund uwamp udinga ku yikumangan yiney yikat kutukasikesh chakwel kwiman dang mu kurish nich yoziu. (1 Pi. 5:9, 10) Changadim umwing mwin Kristu walonda anch: “Nikat kuyang ku shikol dichuku dia kabuj, ni yikat kwinziyish. Pakwez yikumangan yidi mud dijiy dia mem mwi mpay, munikata kwiswedishin chakwel kwikasikesh dichuku dia shikol dilondwila.” Tuyukin mud ik mulong wa usu tukata kusal wa kukumangan ku yikumangan!
4 Kulejan Uyakin: Kulejan rusangu ruwamp kud antu akwau kwadinga mud yakudia kud Yesu. Kwadinga ni kumukasikesh. (Yoh. 4:32-34) Chawiy chimwing, chisu tuyilejina antu akwau piur pa kushilamu kusangareshina kwa Nzamb, tukat kwiyov kwikal akasikeshinau. Kwikal kand akwatikena mu mudimu kukat kulam muchim wetu ni manangu metu mimedina pa Want ni yiyukish yezina kurutu oku. Chikat kutukasikesh chakin kamu.—Mat. 11:28-30.
5 Tuyukin mud ik kutaninamu ku yakudia yivud yipaninay Yehova mulong wa antwend nlel unou! Tudandamenany amboku kutoy nich musangar mulong wa uyaj wend. —Is. 65:13, 14.