Kulejan kwa Want Kukwashin Kupandish Miom!
1 Winou udi mudimu umwing upandikena usey usadikina mu mangand mu chisu chinech. Yehova Nzamb, Yesu Kristu, ni tutikit ni tutikit twa angel atadishin mes mau pa mudimu winou. Ov udi mudimu ik, ni mulong wak udia wa usey? Udi mudimu wa kulejan Want, ni ukwashin kupandish miom!—Rom. 1:16; 10:13, 14.
2 Antu amwing akutwish kutong anch tukutwish kuyikwash nawamp akwetu anch twapakish kwikasikesh mulong wa kurijek ndond yitunyingumukina. Antu avud akat kusal usu nakash mulong wa kulet chisambu, kwok mayej, ap kurijek ekonomi. Pakwez, chom ik chikeza kwikal cha ukwash nakash kud antu?
3 Mudimu Umwing wa Usey Nakash: Uruu wa Want wawiy kusu awinau urumburila rutong ra mwom, musul wa mar ma antu, ni ruchingej rimwing kusu rakin ra machuku ma kurutu. Rusangu ruwamp rawiy riyitwishishina antu kwikal arund nend Yehova ni chad kutambul lel ‘chisambu cha Nzamb chisutila ronganyin rawonsu.’ (Filp. 4:7) Ching kusu uruu wa Want wawiy upanina umutakel ufanyidina chakwel kuyikwash antu kurish nich yikokujol ya mwom katat ni urumburila mutapu wa kusal chakwel kwikal aom chisu chikezau kushesh mangand mayimp mu machuku ma kurutu. (1 Yohan 2:17) Ov chinech chidiap cha usey anch tusala usu wetu wawonsu mulong wa kulejan Want?
4 Chilikej: Chom ik chikwikala chipandikena kuwap kuyikwash antu a ul alela adia mu chak cha mumb usotila kuumbuk katat kamu ak? Ov kudi kusuu mem madia kwinyim kwa mumb usotina kuumbuk? Ap kudi kurijek ul usotina kuyip? Bwat kwau! Chiwapidil kuyilangwish antu in ul, kuyibabesh mulong wa chak chisotina kushik, ni kuyikwash chakwel kuchin! Antu alela muspiritu nlel adi mu chak chijim nakash. (Luka 21:34-36) Mulong ditenchik dia yom dined diyimp dikez kusut katat kamu ak, twikasikeshany kulejan nakash nich kuswapej kud antu awonsu tukutwisha kutan!—2 Tim. 4:2; 2 Pit. 3:11, 12.
5 Tudandamenany Nich Mudimu Winou: Tukimbany mitapu ya kuyilej antu avud a kashinsh rusangu ruwamp—ku yikumbu yau, mu balibal, kusutin ku telefon, ni uman wa kukashimwish. Mudimu utwinkishinay Yehova udi mudimu umwing wa usey nakash utufanyidina kuwanyish. Anch twauwanyish nich mushiku, tukez ‘kwipandish ayinetu ni antu akata kututesh.’—1 Tim. 4:16.