Mekesh Kalimish Mulong wa Mapit ma Uteokras

¹ Chisu chasalau yitenchik chakwel kurijek tempel, Mwant Josias wapana mbil kud antu inkishau chisend cha kusal mudimu, ni kulond anch: “Kakezap kwit kupan kuchind kwa nfalang kud antu ajinkishinau mu makas, mulong akat kusal mudimu nich kushinshaman.” (2 Ant 22:​3-7, NW) Kujingunin usey wa yom yadingau nich amakundj inay kwamekana patok mu mutapu wadingau kulimish ni kusadil mapit mayinkishau. Nlel, chitudia mu mudimu utumbila wa rusangu ruwamp ra Nzamb, ni yetu kand tufanyidin kumekesh kushinshaman mu mutapu tusadidila ni kulimish mapit matwinkishinau.

² Mu Mudimu wa Chingand: Kumekesh kalimish ka uruu wa usey udia mu mikand yetu ni kubabal mulong wa usey wa kuyibudish kukat kutukwash kuyikwat nich usey wa piur nakash. Tufanyidinap kupan mikand yetu chamwamu kud antu akad kumekesh chakin kusanger mulong wa uruu wa Baibel. Anch muntu umekeshin kusanger kukemp mulong wa rusangu ruwamp, tufanyidin kumwinkish trakt pa ndond pa kumwinkish mukand windjing.

³ Pan mikand mu mutapu umwing umekeshina usey way. Ipuk kuyisha pa ndond ya antu awonsu pakutwishau kwau kuyidjibul. Chakwel kwipuk kuyishesh, chind mikand yiukweta ku chikumbu kurutu kwa kwit mikand yivud. Anch chisu ni chisu ukwet mikand yivud yiwejidinaku ya nimero ni nimero wa magazet, shinshikin anch ukutwish kukepish kwit kwey kwa mikand.

⁴ Mikand ya Kusadil Kwey Amwiney: Tufanyidin kwit ching kusu mikand yituswiridina chakin kamu. Tufanyidin kamu kwikal isikena pitwitina Mabaibel ma deliks (Bibles de luxe), Mabaibel makweta mareferans (Bibles avec références), ni mikand yikwau yijim-yijim, mud Concordance, Index, mavolim ma Étude perspicace des Écritures, ni buku Prédicateurs, mikand yiney yawonsu yikat kwit nfalang jivud chakwel kuyibudish.

⁵ Ov ukat kuvurik kufund dijin diey ni adres wey pa mikand yey? Chinech chikwashin kukepish kuswir kwa kuswinkesh kwa mikand yiburedina. Anch washadish buku wa miminy, Baibel, ap mukand wa kwilej, pamwing ap ukez kuutan ku departema wa yom yishadikina ku Chot cha Want ap kwi ndond kusadidinau chikumangan.​—⁠Luka 15:​8, 9.

⁶ Twikasikeshany chakwel kusadil nich manangu mikand yetu. Wawiy mutapu wa kumekeshin kushinshaman kwetu mu mutapu wa kulimish ni kusadil mapit metu ma Want matwinkishinau kud Yehova.​—⁠Luka 16:10.