“Amitiya Kwend”
1 Dichuku dimwing, padingay ni kwisamb nau in kwilejend piur pa uruw, Yesu wisambina ujich mud ‘chipan.’ Kupwa walonda anch: “Muntu mwawonsu ukutwisha kwitiy malejan minam, amitiya kwend.” (Mat. 19:10-12) Pa kusut kwa mivu kanang, kambuy Paul wafunda piur pa yiyukish ya ujich ni kuyikasikesh antu akwau kwimburij chilikej chend cha kushal mujich. (1 Kor. 7:7, 38) Antu avud nlel ‘itiyidin’ ujich ni akat kusanger yiyukish ya ujich. Yisu yimwing ya yiyukish yiney?
2 Kusadil “Nich Michim Yawonsu”: Paul watesha anch ujich wamwinkisha chisu cha kumusadil Yehova “nich michim yawonsu.” Chawiy kand chimwing nlel, mukadivar udia mujich ukutwish kuya ku Shikol ya Mafundish ma Mudimu (EFM), ni muntu udia mujich ukwet want ipau nakash wa kusal mudimu wa uchibol, kwilej rudim rindjing, kushemunikin ndond kudia kuswir nakash, kusadil ku Betel, ap kwirijek mulong wa yisend yikwau ya mudimu wa pakampwil. Ukutwish kwikal ni chisu chivud ni mitapu yivud chakwel kwipan mu kwilej nakash kwa muntu ipend ni kutongijokin ni kwisamb nend Yehova mu malembil madiokila mu muchim. Mujich ukweting chakin kamu chisu chivud cha kwipan amwinend mulong wa kuyikwash antu akwau. Mijikit yiney yawonsu yidi mulong wa ‘ukwash wa muntu ipend.’—1 Kor. 7:32-35; Midimu 20:35.
3 Mudimu mud winou wa Nzamb wakad kampuw ukat kulet yiyukish yipitishina. Kupwa kwa mivu 27 mu Kenya, nambaz umwing mujich wafunda anch: “Kwading arund avud nakash ni midimu yivud! Twasalanga yom pamwing ni kwendijandin umwing ni mukwau. . . . Nadinga ni kusadil want ipau udiokila ku ujich mulong wa kuya ndond yawonsu chakwel kwikal nich yivud ya kusal mu mudimu wa kulejan, ni chanletina musangar ujim nakash.” Ndiy walonda kand anch: “Mu kusut kwa mivu yivud urund wam ni Yehova wakasikana nakash.”
4 Kusadil Nawamp Chipan cha Ujich: Yesu walonda anch diyingishil dia kukudish chipan cha ujich difanyidin kwikal “mulong wa kwipan ku Want wa Mwiur.” (Mat. 19:12) Mud kamu muchidinga chipan chin chawonsu, chipan cha ujich afanyidin kuchisadil mu mutapu uwamp chakwel kulet musangar ni ukwash. Kusutil kusadil yisu yitwinkishina ujich ni kukungamen padiay Yehova mulong wa kutan manangu ni usu, ajich avud ashikedin kal ku kutesh usey wa kwitiyin chipan cha ujich.