‘Munyikany Mud Yimunyik’
1 Mukach mwa mididim ya muspiritu ni ya mwikadil wa ditenchik dia yom dia katat, mamiliyon musamban ma in kumwifukwil Nzamb wakin, Yehova, akat ‘kumunyik mud yimunyik’ mwi ngand 234 pa mangand mawonsu. (Filp. 2:15) Chawiy chikata kutwijikesh swa. Ov mutapu ik tukata kumunyik chitokish chipandikena kuwap cha uyakin udiokila kudiay Yehova?—2 Kor. 3:18.
2 Yisalijok Yetu: Antu akat kujingunin swa mwikadil wetu. (1 Pi. 2:12) Mband umwing wamana anch Kaman umwing wadinga mbay nend wa mudimu wadinga mwin rukat ni mwin kukwashan ni kadingap ni kulond mazu ma usany ap kusanger maswimbu mijondila. Papakijau akwau kumusarumun Kaman winou nich kusadil mazu mijondila kurutu kwend, ndiy wikuchika zoong, ni kulamat dang ku yom yitentamina. Yom yiney yikala nich usu ik padiay mband mwinou? Ndiy uvurikin anch: “Nashimoka nakash mulong wa ngikadil yend, nasambisha kwipol yipul piur pa Baibel. Nasambisha kwilej Dizu dia Nzamb ni kupwa natambula dibatish.” Ndiy walonda kand anch: “Ngikadil yend yawiy yambachika kushinshikin yitiyij ya Atuman’a Yehova.”
3 Mwikadil wetu wa manangu pantaliken nich wintakel, mutapu wetu wa kuman yisalijok ya mangand, ni kulond kwetu kwishitwila kukat kuyijikesh Atuman’a Yehova mud antu akata kushakam kwambatan nich yany ya piur nakash ya Baibel. Midimu yiwamp mud yiney yikutwish kulet uyaj padiay Yehova ni kuyipwitin antu akwau ku difukwil diend.
4 Kulond Kwetu: Chakin, antu akata kuman ngikadil yetu yiwamp kakutwishap kwijik mulong wak tushalijadina anch twisambinap nau piur pa yitiyij yetu. Ov antu usadilinga nau mudimu ap udinga nau ku shikol ij anch udi Kaman’a Yehova? Ov ukat kukimbang yisu chakwel kupan uman piukata kwambambany? Ov chiyul chey chidi cha kulik ‘kutok kwey kumunyika kurutu kwa antu’ pa chisu chin chawonsu chifanyidina?—Mat. 5:14-16.
5 Kuwanyish mudimu wetu mud yimunyik kwitin spiritu wa kwipan. Mwikadil wa kwipan nich mupim wetu wawonsu ukez kutubachik kwitekin mimbu ku yom yimwing yakad usey chakwel kusal nakash mud chitwishikina mudimu wa kupandish mwom wa kulejan ni kwikadish in kwilej.—2 Kor. 12:15.
6 Kusutil ku kulond kwetu ni ku yisalijok yetu, tudandamenany kumunyik mud yimunyik. Ang twasal mwamu, antu akwau akutwish kwikal abachikinau kwinung netu pamwing mu kupan uyaj kudiay Yehova.