Ansand Amunyikina mud Yimunyik

1. Mutapu ik umekeshinay Bibil anch in Kristu akutwish kwikal ashalijadina, ni mutapu ik mazu minam mayitadil ansand in Kristu nlel unou?

¹ Yesu wayileja in kwilej end anch: “En udiany kutok kwa mangand.” (Mat. 5:​14, 16) Mud musumb udia pa musong wa mukandu, umunyikidina nsis ja muten, kakutwishap kuujindjik. Nlel unou, ansand avud in Kristu akat ‘kumunyik mud yimunyik mu mangand’ kusutil ku chaku chau chiwamp ni ku kulejan kwa mushiku.​—⁠Filp. 2:15; Mal. 3:⁠18.

2. Mitapu ik yimwing ukutwisha kupanin uman kud alej ni ambay a shikol?

² Ku Shikol: Mutapu ik ukutwisha kupan uman ku shikol? Ansand amwing isakidin ku minsamb ya mu kalas pa mitu ya milong mud kuna yom yileushena, kwikarumun, ni Chakupesh cha pa Chintamb​—⁠tujimbula kusu yiney. Nambaz umwing amwinkisha mudimu wa kufund pakemp piur pa yom yovishena wom chakwel kupan uman piur pa Want wa Nzamb mud ruchingej rakin mulong wa antu. Mulej washimoka ku yitongijok yiwamp ya rapor, ni chinech chazurila chis mulong wa uman ukwau.

3. Mutapu ik ukutwisha kumunyik chitokish chey ku shikol kusutil ku chaku chey?

³ Mutapu ukwau wa kumunyik mud chimunyik udi kusutil ku chaku chetu ni kudjal ni kwileng kwa kwikepish. (1 Kor. 4:9; 1 Tim. 2:⁠9) Anch ansand a shikol ni alej aman anch chaku chey chishalijadin, amwing akutwish kwikal apwitinau ku uyakin mud chibudikin cha chaku chey chiwamp ni kukwinkish mutapu wa kulejan uyakin wa Bibil. (1 Pi. 2:12; 3:​1, 2) Kumekesh chaku cha winzamb kukutwishap kwikal kuswapela, pakwez Yehova ukukuyukish nakash. (1 Pi. 3:​16, 17; 4:14) Chakwel kuvuvurish kusanger mu rusangu ruwamp, ukutwish kutang mukand wa Bibil chisu cha kwipimish ap kuutul pa ndond yikutwishau akwen kuuman.

4. Yisu yiyukish yimwing ya kupan uman ku shikol?

⁴ Kumunyik kutok kwen ku shikol kukasikeshin ritiy ren ni kukukwashinany kwiyov kuwamp mu kumusadil Yehova. (Jer. 9:24) Kukwashin kand mud diking. Nambaz umwing walonda anch: “Chiyukish chimwing cha kulond piur pa yitiyij yam chidi anch asand a shikol kakutwishap kupakish kwinshidil kusal yom yakad kwovijan nich yilondilay Bibil.”

5. (a) Mutapu ik utandurishinau ansand amwing mudimu wau? (b) Jisu ntong jey ja muspiritu?

⁵ Mudimu Utandurikina: Mutapu ukwau umunyikinau ansand avud mud yimunyik udi kusutil ku kutandurish mudimu wau. Kupwa kwa kupwish shikol ya piur, mukadivar umwing washemunika kusadil kwi ndond kwadinga kuswir kujim nakash kwa in kulejan a Want. Ndiy wadinga mu chikumangen chikemp chadinga kusu nich mukurump umwing. Wamufundila murund nend anch: “Nikwet chisu cha musangar nakash kunoku.” “Mudimu udi ukasikeshina nakash! Tukat kwambamb piswimp minit 20 ku chis ni chis mulong antu asotil kutesh yawonsu ukutwisha kuyilej.” Wawejaku anch: “Nisotil ing kach nsand win mwawonsu wasalang mwamu ni kwov mutapu niyovila am. Kwikil chom chipandikena kuwap kumusadil Yehova nich yawonsu tukweta.”

6. Yom ik ubazina piur pa ansand adia mu chikumangen chen?

⁶ Twibazin nakash mulong wenen asand umunyikinanya mud yimunyik mu mangand! (1 Tes. 2:20) Chiumusadidilanya Yehova nich muchim wen wawonsu, mupim wen, manangu men, ni usu wen, ukez kwakany “chitot cha kabuj pa muten winou . . . ni mu mangand masotila kwez, kupand kwa chikupu.”​—⁠Marko 10:​29, 30; 12:⁠30.