Yakul Ku Yipul Yen

◼ Mutapu ik tukutwisha kushinshikin nawamp chisu cha yikumangen ya chikumangen?

Chisu chisutining swa pitukata kusalang chom kanang chiwamp nau arund. Mulong wa chinech, chikutwish kwikal chikash kusutish yikunku ku chikumangan mu chisu chilejenau. Ov chom ik chikutwisha kutukwash?

Sambish pa chisu. Pichikata kukumangan chikumangen chawonsu, chikutwish kwikal cha ukwash kuyit in kukumangan kushakam kurutu kwa minit umwing ap aad chakwel anch chikumangan chisambisha pa chisu ni pakad kanvundangesh. (Mul. 3:⁠1) Yikumangan yikwau ya yisak yikemp-yikemp, chilikej mud yikumangan ya mudimu wa chingand, yifanyidinap kucheleu mulong wa kuyichingel antu akata kucheleu.

Irijeka nawamp. Njil yimwing yiwamp ya kulondwil chisu yidi kwirijek kurutu kwa muten. Ijik nawamp mu manangu rutong ra chikunku chey. Jingunin manans majim, ni makasikeshina. Ipuk kusutish chisu mu tuyom tukemp-tukemp. Dandamen nich minsamb mutapu uswapela. Anch chikunku chikwet yakumenaku ap ma interview, yichirikinany kurutu kwa chisu. Anch chitwishikin, shinshikin chisu piwiyijidishina nich dizu dizambukina.

Katul mu yikunku rusangu rey. Chikunku chey chikalap nchik diskur ap minsamb nau in kukumangan, chikwikal cha ukwash kukatul rusangu rey mu yikunku. Kwat mupak wa aminit ukutwisha kusutish ku chikunku ni chikunku, ni tekap chijingidij kuns kwa dipaper piufundina. Kupwa shinshikin chisu chey piusutishina minsamb. Mu minsamb nau in kukumangan, ipuk kwit yirumburil yivud-yivud mu mazu makusambish nich mulong wa kulik kusut mau-mau manans ma usey ma kumekana kwinyim. Antakel a Dilejan dia Tour de Garde afanyidin kusha chisu chiwanyidina mulong wa kuchirikin yipul yidia mu mushet kwisudiel. Afanyidin kand kubabal mulong wakulik kusadil chisu cha muminy ni malembil ma nsudiel.

Pwish pa chisu. Anch chikumangan chikwet yikunku yivud, chilikej mud Chikumangan cha Mudimu, mwin kulond mwawonsu ufanyidin kwijik chisu chisambishinay ni cha kupwish chikunku chend. Chom ik chifanyidina kusal anch chikumangan chisotil kusutish chisu? Mukadivar umwing ap avud afanyidin kudimukin chisu chakwel kwasin ching pa manans ma usey ni kwipuk kwisambin tuyom tukemp-tukemp. Ukaliweny wa kusal mwamu udi chijiken cha mulej muwamp ukweta nkeu.

Chitudia in kukumangan, tukumukwash mukadivar utakedila kusutil ku kupan yakul yiswimp ni yasidina pa dinans dijim. Chawiy lel, tukutwish etu awonsu kusadil pamwing chakwel yikumangan yisadika “nawamp wakad kurumbangesh.”​—⁠1 Kor. 14:40.