Isakina Kwilej kwa Buku Approchez-vous de Jéhovah
1 Ku chikumangan cha Distrik “Antwarubil a Want Akweta Mushiku,” twasangara nakash kutambul buku Approchez-vous de Jéhovah. Antu avud amutanga kapamp kamwing. Mufund wa muvu wa 2003: “Sejany piswimp kudi Nzamb, chad niyend ukusej piswimp ni yenen” wayibachika antu akwau kumutang. —Jak. 4:8.
2 Pa Rish tukusambish kwilej buku Approchez-vous de Jéhovah mu Dilejan dia Buku dia Chikumangen. Ov, mutapu ik tukutwisha kwisakin nakash ku dilejan dietu? Chidi cha usey kwirijek. Tukwilej mwimbu ni mwimbu mbing jaad, ku program wa dilejan dia rubing ni rubing ku kwikal maparagraf makemp. Chinech chikez kulet chisu chiwanyidina cha yishimunin yen yidiokila ku muchim yengamidina pa dilejan dien ni kutongijokin kwen pa yom ya dilejan. Chikwau kand, kukez kwikal maparagraf makemp ma kwilej pa mbing mu kupwishil mimbu mulong wa chikunku cha kuchirikinamu, chakwel kusha chisu cha kwisambin milong yijim ya buku.
3 Kusambish pa mwimbu wa 2, mushet ukweta mutu wa mulong “Yipul ya Kutongijokin” udi kwi nsudiel kwa mwimbu ni mwimbu. Kupwa kwa kwilej paragraf wa nsudiel mu mwimbu, kalam’a dilejan dia buku ukwisambin mushet pamwing ni chirund. Ukuyikasikesh yid ya chirund kulet yitongijok yau, kusot yitongijok yiwamp ya kutongijokin kwau pa Mifund. (Jinsw. 20:5) Kuwejinaku ku yipul yidia mu mushet, ukutwish kwipul yipul mud yilondwila ey: “Ov, rusangu riner rikulejinany chom ik piur pa Yehova? Rikwet usu ik pa mwom wen? Ukutwish kurisadilany nchik chakwel kuyikwash antu akwau?” Rutong rend ridi ra kusot yishimunin ya ku muchim, kudiap kupak chirund mu tuyom tukemp.
4 Dilejan dia Approchez-vous de Jéhovah didi dia pakampwil. Ap anch mabuku mawonsu ma “kashalapol ushinshamena ni kubabal” makat kumushiman Yehova, buku winou wisambin pakampwil ngikadil ya Yehova. (Mat. 24:45-47) Yiyukish ya musangar mud ik yituchingedina kurutu oku! Tukez kwisakin chipandikena mu kwilej kukurik untu wa Yehova. El komb dilejan ditukwasha kusejin piswimp ni tatukwetu wa mwiur, ni twikalany ayifuvu mu kuyikwash antu akwau kumusejin.