Kapurumutany ka in Njit Adia pa Atubar Niyey Kakutadin
1, 2. Kuwanyin kwa chishimushimu cha uprofet kulejenau mu Kujingunik 9:13-19 kuyitadin nchik atushalapol a Nzamb nlel unou?
1 “Mwangel wa musamban wabula mpuny yend.” Kupwa, kwovikana chidjimin cha dizu dijim cha “in njit adia pa atubar” kuvul kwau ading “tutikit makum maad”. Inay kadiap kwau amasalay a chamwamu. “Mitu ya atubar yading mudi mitu ya antambu.” Mu tun twau mwabudika kasu, mish ni sulifur, ni “mikil yau yidi mudi annak.” Chifanikesh chinech cha in njit adia pa atubar chiletin kusheshik. (Kuj. 9:13-19) Ov wij mutapu kukutadina niyey kuwanyin kwa chishimushimu chinech cha uprofet?
2 Ashadilaku a kashalapol uzizidilau many ni ambay nau, amikoku akwau, akat kulejan pamwing dirumburish dia Nzamb. Akat kulejan patok yibudikin yawonsu ya mwikadil wa rufu ra muspiritu ra Kristendom. El tushinshikinany yom yaad ya chishimushimu cha uprofet yikasikeshina mulong wak mudimu wa atushalapol a Nzamb ukwet usu.
3. Diyiy dia mutapu ik watambwila mulong wa kulejan uruu wa Nzamb muchifanyidina?
3 Afumbinau ni Awanyishinau Kulejan Uruu wa Nzamb: Ku ukwash wa Shikol ya Mudimu wa Uteokras ni yikumangan yikwau ya chikumangen, in mudimu a Nzamb ayifumbin kulejan uruu wa Nzamb nich ulabu. Mu kumwimburij Yesu ni in kwilejend, ayil ni kuyisot antu a kashinsh, end alejan ndond yin yawonsu yikutwishau kutan antu. (Mat. 10:11; Marko 1:16; Luka 4:15; Midimu 20:18-20) Mulad winou wa kulejan ushindamedina pa Bibil ukwet yibudikin yiwamp mud ik!
4. Ov, yom ik yikwetau in kulejan yiyikwashina kuwanyish mudimu wau?
4 Mu kuwanyish kwa mudimu wa Nzamb wa kulejan, atushalapol in Kristu apalangeshin tutikit twa mabibil, mabuku, mabroshir ni magazet. Mikand yiney yidiaku piswimp mu mazu 400, yikwet mitu ya milong kushalijan ni yisadidil milad yiyipwitina antu a mitapu kushalijan. Ov, ukat kusadil muchifanyidina mikand yiney?
5, 6. Yom ik yimekeshina anch Yehova uyikwashin antwend?
5 Umutakel ni Ukwash wa Mwiur: Chishimushimu cha uprofet chovikeshin kand patok anch mujikit umekeshinau kud in njit adia pa atubar a chifanikesh autakedidin kud Nzamb. (Kub. 9:13-15) Mudimu wa kulejan mu mangand mawonsu auwanyishin, chidiap ku manangu ap ku usu wa muntu, pakwez chidi ku spiritu wa Nzamb. (Zak. 4:6) Yehova usadidil angel mulong wa kutakel mudimu winou. (Kuj. 14:6) Pa chinech, pamwing nich usu wa Atuman end, Yehova usadidil ukwash wend mulong wa kuyipwitin in kwitudish kudiay ndiy.—Yohan 6:45, 65.
6 Kwikil usu ukutwisha kuyikangesh antu a Yehova, mulong ayifumba kal ni kuyiwanyish nawamp, end asadil mwishin mwa umutakel wa angel chakwel kulejan uruu wa Nzamb. Tudandamenany kusal mudimu wetu mu kuwanyish chishimushimu chinech cha uprofet chikasikeshina.