Yehova Uyikwashin Antu Amuchingejina
1 Antu avud akat kuman dipit, usu ni ukaliweny wa muntu mud yom ya usey chakwel kutan ntumb. (Kus. 12:4; 33:16, 17; 49:6) Pakwez, antu amwovila Yehova wom ni kumuchingejin ij nich kashinsh yilondila Bibil anch ‘ndiy nkwash wau ni rikibu rau.’ (Kus. 115:11) El tushinshikinany njil jaad mu tuswiridina kumekesh kumuchingejin Yehova.
2 Chitudia Atushalapol in Kristu: Twikalap nchik nich yisend mu chikumangen ap kulejan mu mudimu wa chingand, tufanyidin kwikamen padiay Nzamb wetu. Tushinshikinany chilikej cha Yesu. Ap anch wadinga Mwan a Nzamb, kachingejinap manangu mend ap ukaliweny wend amwinend pakwez wikamena kamu mu yawonsu padiay Tatukwend wa mwiur. (Yoh. 12:49; 14:10) Chakin kamu niyetu tuswiridin kwikamen nakash padiay Tatukwetu wa mwiur! (Jinsw. 3:5-7) Ching kusu kusutil ku ukwash wa Yehova kwawiy usu wetu ukemp ukeza kumutumbish ndiy ni kuyikwash akwetu.—Kus. 127:1, 2.
3 Tumekeshining kwikamen kwetu padiay Yehova kusutil ku kwit umutakel wend mu malembil ni ku kumwit ukwash wa spiritu utumbila. (Kus. 105:4; Luka 11:13) Chikwau kand, tumekeshin ruchingej retu mudiay Nzamb kusutil kulejan kwetu kwimedina pa Dizu diend, Bibil. Uruu wend ukwet usu wa kushik ku michim ya antu ni kukarumun mwom. (Heb. 4:12) Yehova akumutumbish ‘pitusadila mud mwatwinkishinau kal usu kud Nzamb.’—1 Pi. 4:11.
4 Piturishina Nich Milong: Tuswiridin kand kumwit Yehova ukwash piturishina nich yakamish ni milong. (Kus. 46:1) Chilikej, mukurump wa mudimu ukutwish kwidjidjek pa kutwinkish konje mulong wa kuya ku chikumangan chijim, ap kurish nich mikadil yikash mu mashakamin ma dijuku dietu. Tukumekesh ruchingej retu mudiay Yehova ku kumulembil chisu ni chisu ni kusadil umutakel uletinay kusutil ku Dizu ni dirijek diend. (Kus. 62:8; 119:143, 173) Mu kusal mwamu, atushalapol a Yehova amen ukwash wend mu mwom wau.—Kus. 37:5; 118:13, 16.
5 Yehova amwinend utushinshikin anch: ‘Wayuk kwend muntu ukungamedina padiay Yehova, ni utekina ruchingej rend mudiay Yehova.’ (Jer. 17: 7) Komb tumekeshany lel ruchingej retu mudiay ndiy mu yom yawonsu tusadila!—Kus. 146:5.