Program Musu wa Chikumangan cha Munyimuku
1 Chakwel kudandaken mu ritiy mu mangand ma kanvundangesh, tufanyidin kukungamen padiay Yehova. Mutapu ik tukutwisha kumekesh kukungamen kwinoku mu mwom wetu wa pichuku-pichuku? Mutapu ik kukungamen padiay Yehova kukwetinga usu mu mwom wetu ni wa dijuku dietu? Mutapu ik kukata kutukwash kujijaman ku yipwichik ya mangand ma Satan? Program wa chikumangan cha munyimuku wa muvu wa mudimu wa 2003 ukwakul ku yipul yiney. Ukwet mutu wa mulong anch ‘Kungamenany Padiay Yehova, ni Salany Yiwamp.’—Kus. 37:3, NW.
2 Tuswiridinap kumekesh kukungamen kwetu ching mu yisu yimwing ya pakampwil ap mu yisu ya mar makash. Kukungamen kwetu padiay ndiy kutadin mitambu yawonsu ya mwom wetu wa pichuku-pichuku. Chinech akuchikasikeshin mu diskur dia kusambish, ‘Kungamenany Mudiay Yehova Miten Yawonsu.’ (Kus. 62:8) Diskur dia yikunku yinying “Mekeshany Kukungamen Kwen Mudiay Yehova” dikez kutulej mutapu wa kutan ni kusadil rusangu ra pa dishin dia Baibel rikutwisha kutukwash kutung uruu ukash, kupwish yikokujol yikata kulank mu dijuku, ni mutapu wa kuwanyish maswir metu ma yom ya ku mujimbu.
3 Mangand ma Satan makat kutushindil yitongijok yiyimp piur pa yidia yitentamina ni yidia yiyimp ni kulet kanvundangesh pa yom yifanyidina kwikal pa ndond ya kusambish ni yakad usey. (Isa. 5:20, NW) Madiskur “Ilamany ku Yom Yakad Usey mu Mwom” ni “Ipukany Uyimp—Ikalany in Kusal Yiwamp” makez kukasikesh chiyul chetu cha kujijaman kuchidij yany ya piur yitentamina ya Yehova.—Amos 5:14, NW.
4 Pakezay Yehova kulet nsudiel ku ditenchik dined dia yom diyimp, atushalapol a Nzamb akez kuswiriken kukungamen nakash padiay ndiy. Chinech achikasikeshidin mu diskur dia pibur, “Kupand ku Mangand ma Mar Kudi Piswimp.” Kupwa, akez kutwit kwishinshikin ayinetu mu chikunku chilondila anch “Ov Akez Kukuchindin Kwikal Ufanyidina Want wa Nzamb?” Program ukez kupwa nich dikasikesh dia “Kukungamen mu Kushilamu kwa Yehova.”
5 Chikunku cha usey cha chikumangan chin chawonsu chiding diskur dia ubatish. Mwawonsu usotila kutambul dibabatish ufanyidin kwisamb nend kalam-ntakel swa mud chitwishikina chakwel akwata yitenchik yifanyidina.
6 Mu yisu yiney yakad kuchingejin, Yehova udi musul umwing kusu wakin wa ruchingej ni kujijaman. (Kus. 118:8, 9) Tukasikeshany etu awonsu kukungamen kwetu mudiay ndiy nich kwikal ku program mwawonsu wa chikumangan cha munyimuku.