Chikal Tukweta kud Akwetu
1 Mupostol Paul wiyova kwikal nich chisend cha kuyilej antu. Ndiy wijika anch Yehova wachisala chitwishika mulong wa antu a mitapu yawonsu chakwel kupandin ku mash ma usey ma Mwanend. (1 Tim. 2:3-6) Chawiy lel, Paul walonda anch: “Am nidi mwin chikal cha in Grek ni cha in mangand makwau, ni cha in ronganyin ni antu ayisup.” Ndiy wasala nich kutakaman ni mushiku mulong wa kufut chikal chend kud antu akwau kusutil ku kuyilej rusangu ruwamp.—Rom 1:14, 15.
2 Mud Paul, in Kristu nlel unou akimbin kwangan rusangu ruwamp kud amutej nau pa chisu chin chawonsu. Mulong wa “mar mapandakena” masejina mau-mau, kukimb kwetu antu akweta muchim uwamp kudi kwa kuswapej. Likany amboku rukat rakin mulong wa antu rutubachik kwikal ni mushiku mu mudimu winou upandishina mwom.—Mat. 24:21; Ezek. 33:8.
3 Tufutany Chikal Chetu: Mutapu wa kusambish tukata kuyishiken antu udi kusutil kulejan ku chis ni chis. Chisu tutanina ku chikumbu kwakad antu, tufanyidin kufund nawamp ni kuchirik yisu kushalijan kukutukwash kwambamb nau antu avud. (1 Kor. 10:33) Tukutwish kand kuyishiken antu kusutil ku kulejan uman mu materitwar ma winsak, mu mikombil, mwi ndond ya kwiswedishin ni mwi ndond ya kwimikin motak, ni kusutil ku telefon. Tukutwish kwiyipul ayinetu anch: ‘Ov, nikat kusal usu wam wawonsu wa kulondul mitapu yawonsu ya kulejan chakwel kwangan uruu wa mwom?’—Mat. 10:11.
4 Chibol umwing wiyova nakash kwikal nich chisend cha kukimb antu awonsu mu teritwar wend. Ku chikumbu chimwing marido mading chisu chawonsu makupat, ni kwikil muntu ap umwing wadinga ku chikumbu. Pakwez, dichuku dimwing chisu chalikay kuya mu mudimu, ndiy wamana motak kurutu kwa chikumbu chinech kwadingay kutan antu kwamwamu. Pakad kushadish chisu, ndiy wabula ku rupwambu ra ku chis. Ikundj umwing wakula, ni mambamb ma kusambish mashikija ku kuchirikin kusu kuvud kud nambaz chibol winou ni nfumwend. Kupwa, ikundj witiyija dilejan dia Bibil, ni udi katat mukadivar ubatishinau. Ndiy ujikitishin nakash mulong nambaz winou wiyova nakash kwikal nich chikal cha chisend chend cha kulejan kud akwau.
5 Mulong disudiel diezin mau-mau, katat wawiy lel muten wa kufut chikal chetu kud akwetu kusutil ku kusal ayinetu usu nakash mu mudimu wa kulejan.—2 Kor. 6:1, 2.