Tutakelany Malejan ma Bibil Mayila Kurutu Chikunku 11: Kuyikwash in Kwilej Kusal Kuchirikinamu Kusu
1 Chisu chikusambishay mwin kwilej Bibil kwipan mu mudimu wa kulejan, ukutan antu amekeshina kusanger mulong wa rusangu ruwamp. Mutapu ik tukutwisha kumukwash mwin kulejan musu kusal nawamp kuchirikinamu kusu ni kukudish kusanger kutaninay?
2 Kwirijek mulong wa kuchirikinamu kusu kukat kusambish pa kumanijan kwa kusambish. Mukasikesha mwin kwilej kwikal mwin kuyisanger kwa kashinsh antu alondishinay. (Filp. 2:4) Mwijidisha mwin kwilej pakemp-pakemp kuyit in chikumbu kulond yitonginau, kutesh yirumburil yau, ni kushinshik yom yiyikwatina awiy. Chisu chimekeshinay muntu umwing kusanger, muleja mwin kulejan musu kufund rusangu ra usey piur pa muntu. Sadil rusangu riner mulong wa kumukwash ndiy kurijek minsamb yikwau.
3 Kwirijek Chakwel Kuchirikinamu: Chirikin kumanijan kwa kusambish, ni muleja mwin kwilej mutapu wa kutond mulad wa uruu wa Want ukeza kumusangaresh mwin chikumbu. (1 Kor. 9:19-23) Rijekany pamwing minsamb yiswimp yikusadila mufund umwing wa Bibil pamwing ni paragraf mu buku wa dilejan. Chikwau kand, kurijek chipul cha kwipul kwinsudiel kwa mambamb chakwel kutek chilal mulong wa kuchirikinamu kwambakedinap. Muleja mwin kulejan musu mutapu wa kuwejin Dizu dia Nzamb ku ronganyin ra muntu nich kuchirikinamu kwin kwawonsu kwambakena.
4 Chidi kand cha ukwash kumufundish mwin kwilej mazu ma kusambish nich maswapela. Kupwa kwa kumulangwish mwin chikumbu, ndiy ukutwish kulond anch: “Nasangeridin mambamb metu ma kusambish, ni nachirik kal nikuleja rusangu rukwau ra Bibil [jimbul mutu wa mulong].” Ukutwish kand kumulej mwin kulejan musu mutapu wa kwakul anch muntu windj wakul ku chis.
5 Kulondul kwa Mushiku: Mukasikesha mwin kwilej kwikal chilakej chiwamp mu kuyichirikin awonsu amekeshina kusanger swa-swa. Kuyitan antu ku chikumbu kukutwish kwit kudandamen mu kuchirikinamu. Mufundisha mwin kwilej mutapu wa kwovijan mulong wa kuchirikin kand, ni kumukwash kwov kurumburik kwa usey wa kuchirikinamu mud mwakanangay. (Mat. 5:37) Mufumba mwin kulejan musu kwikal mwin rukat, mwin kutong, ni mwin kalimish pakimbinay antu adia mud amikoku ni kukudish kusanger kwau.—Titus 3:2.