Tutakelany Malejan ma Bibil Mayila Kurutu Chikunku 10: Tuyijidishany in Kwilej mu Mudimu wa ku Chikumbu ni Chikumbu

¹ Chisu chikujinguninau amakurump anch mwin kwilej wa Bibil uwanyidin kwikal mwin kulejan wakad kubabatishiu, ndiy ukutwish kusambish kubombakan ni chikumangen mu mudimu wa patok wa kulejan. (Tal Atenchikinau Chakwel Kusal Rusot ra Yehova, p. 79-81.) Mutapu ik tukutwisha kumukwash mwin kwilej kuwanyish rutong ra kulejan ku chikumbu ni chikumbu?

² Kwirijek Pamwing: Kwirijek kuwamp kudi kwa usey. Muleja mwin kwilej kwisu kukutwishay kutan yiyul ya kusambish nich minsamb mu Mudimu Wetu wa Want ni mu buku Comment raisonner, mukwasha kutond mutapu uswapela udia wa ukwash mulong wa teritwar wen. Kudiosh kamu kwinsambishil, mukasikesha kusadil Bibil mu mudimu wend.​—⁠2 Tim. 4:⁠2.

³ Kusutirik tupamp tuvud minsamb kudi kwa usey nakash mulong wa mwin kulejan musu. Pasutirikinay mwin kwilej minsamb, muleja mutapu wa kwakul nich manangu ku yipul yikatau kwipul chisu ni chisu mu teritwar. (Kol. 4:⁠6) Muleja anch atushalapol in Kristu kakutwishap kwijik chakul ku chipul chin chawonsu cha mwin chikumbu. Yisu yivud chiding chiwamp nakash kwakul ku yipul mud yiney kusutil ku kwipan mu kukimbijol ni kuchirik kwisambin chipul kupwa kwa machuku makemp.​—⁠Jinsw. 15:⁠28.

⁴ Kulejan Pamwing: Kapamp ka kusambish kayilay mwin kwilej mu mudimu wa ku chikumbu ni chikumbu, mulika ashinshika piusadidila minsamb warijekangany pamwing mwaad wen. Kupwa mulika niyend alejan. Yisu yimwing, chikutwish kwikal chiwamp nakash kud mwin kulejan musu kusadil kusu chikunku cha minsamb, mud kutang ap kurumburil mufund. Shinshikin untu ni ukaliweny wa mwin kwilej. (Filp. 4:⁠5) Ikal mwin kumujikitish piuyila ni kumwijidish mu milad kushalijan ya mudimu wa kulejan.

⁵ Chidi cha usey kumukwash mwin kulejan musu kutek program wakad kujing mulong wa kwipan mu mudimu, kusalang mwamu rubing ni rubing anch chitwishikin. (Filp. 3:16) Itenchikany nawamp mulong wa kusal pamwing mu mudimu, ni mukasikesha kand kusal nau antu akwau in mushiku. Chilikej chau ni kusadil nau pamwing kukumukwash kukudish ukaliweny ni kutan musangar mu kulejan kwa ku chikumbu ni chikumbu.