Mekesh Kusanger kwa Pakampwil—Mu Kwikal Mwin Kushinshik
1 Yehova Nzamb ni Kristu Yesu ij nawamp nakash kujingunin maswir ma pakampwil ma antu ni kuyikwash. (2 Jins. 16:9; Marko 6:34) Chisu tujingunina yisakin ni yakamish ya antu tusankena mu mudimu wetu, tukutwish kuswimp minsamb yetu ya rusangu ruwamp kukwatijan nich yiney.
2 Shinshik Chom ni Chom: Yesu wading mwin kushinshik. (Marko 12:41-43; Luka 19:1-6) Chawiy chimwing, chisu tusejina ku chis cha mwin chikumbu ni kuman yifwatul ya relijon, mazu ma kukumbujol madia pa motikar, ap yinambay (yom yikatau kusengan nich an) mu rupang, tukutwish kusarumun mitapu ya kupan uman wa rusangu ruwamp ukweta mabuj.
3 Mishish ya mpal ya muntu ni mutapu umekenay yikutwish kulejan chom kanang piur pa muntu. (Jinsw. 15:13) Pamwing ap kushadik kwa mukatish nend ap mwikadil ukwau kanang wa runeng wamushil mu maswir ma rongoj. Chikutwish kumusangarish anch twamutangin mifund yimwing yifanyidina. (Jinsw. 16:24) Ov, mwin chikumbu uswakejin chakwel adiokal ku chikumbu bil anch wongojin mwan udidila? Anch mwamu, chikutwish kwikal chiwamp nakash kwovijan kwez chisu chikwau. Anch twata muchim ku maswir ma akwetu ni ‘kwongojijan,’ tukutwish kumubachik muntu kututesh chisu tukuchirikinaku.—1 Pi. 3:8.
4 Swimp Mutapu Wey wa Kurumburil: Mupostol Paul washinshika anch musumb wa Aten wading nich chintamb chipaninau ‘Kudi Nzamb Wakad Kwijikan.’ Chinech chabachika mutapu wend wa kulejan rusangu ruwamp, mulong walonda anch: “Chiukata kwifukwilany en mu kujilijil chawiy chinisotila kukulejany.” Mulad wa nkeu wa Paul wayibachika amwing adingap kuta muchim ku uruu wa Want ni kwikal akaritiy.—Midimu 17:23, 34.
5 Chilik chimwing, kushinshik kwetu kukutwish kutukwash kujingunin yisotilau antu ni kututwishish kuswimp minsamb yetu. Sadil yipul yikutwisha kumukasikesh mwin chikumbu kulond. Tong mifund ukutwisha kusadil chakwel kukasikesh kusanger kwend. (Jinsw. 20:5) Kushinshik kwetu ni kumekesh kusanger kwakin kwa pakampwil kud antu akwau kukutukwash kulejan rusangu ruwamp nawamp nakash.