Isamba ni Antu Akwau Piur pa “Kutok kwa Mangand”
1. Kutok kujim ik kwasambelau kulejan mu Dizu dia Nzamb, ni chisu ik chipwitina manangu pakampwil ku kutok kwinoku?
1 Kusutil kudiay muprofet Isay, Yehova wasambela kulond anch: “Antu ading ni kwendil mu mididim, amana kutok kujim. Antu ading ashicha mwi ngand ya mididim yikash, chimunyik chayimunyikina awiy.” (Isa. 9:2) “Kutok kujim” kwinoku kwamekana mu midimu ya Mwan kapokal wa Nzamb, Yesu Kristu. Mudimu wend wa kulejan padingay pa mangand ni yiyukish yadiokala ku kwipan kwend kwayitokishin muspiritu antu adinga mu mididim ya muspiritu. Kutok kwa mutapu winou kwawiy kuswiridinau antu adia mu yisu yiney ya mididim. Yakudia ya Urel Ya Mwant yitwinkishin mutapu wa pakampwil wa kwisamb ni antu piur pa “kutok kwa mangand.” (Yohan 8:12) Muvu wadiap ou, tutikit twa antu twamekeshin chisik cha ritiy mu kwinung netu mu kuziyil mbil ya Yesu yilondila anch: “Uchisadilangany mu kwinvurik am.” (Luka 22:19) Pichisejina piswimp Chivurikish cha muvu unou, mutapu ik tukutwisha kwipan mu kwisamb ni antu ya kutok kujim kwamunyikay Yehova nakash?—Filp. 2:15.
2. Mutapu ik tukutwisha kukasikesh kujikitish kwa muchim wetu mulong wa difut dia yakupesh, ni chibudikin ik chikwikalaku mu kusal?
2 Kasikesh Muchim wa Kujikitish: Chirung cha Chivurikish chidi chisu chiwamp cha kutongijokin pa rukat rijim ramekeshay Yehova ni Yesu mu kupan difut dia yakupesh mulong wa akaantu. (Yohan 3:16; 2 Kor. 5:14, 15) Kusal mwamu kukuwejin chakin kamu kujikitish kwetu kujim mulong wa chisu chinech chitumbila. Atushalapol awonsu a Nzamb awapidil kwitekin chisu cha kutang ni kutongijokin pa Chivurikish cha kutang Bibil pakampwil, mud mulejenau mu Examinons les Écritures chaque jour. Kutongijokin ngikadil ya piur ya Yehova, yipandakena kuwap yijinguninau mu ditenchik diend dia difut, kutusadil twibaza mulong wendendiy kwikal Nzamb wetu. Kutongijokin pa kurumburik kwa difut mulong wetwetu pakampwil kuwejidin rukat retu ra kashinsh mulong wa Nzamb ni Mwan end ni kutusosil twikasikesh ayinetu mu kusal rusot ra Nzamb.—Gal. 2:20.
3. Mutapu ik tukutwisha kumekesh kujikitish kwetu mulong wa Chivurikish?
3 Anch twakudish kujikitish kwetu mulong wa ditenchik dia dipandish dia Yehova, kuzangurok kwetu mulong wa Chivurikish kukuyibachik in kwilej Bibil, ayilau ni kutal, anamakwetu, amutej, ambay a shikol, ambay a mudimu, ni akwau tutazukina pa chisu chinech cha pakampwil. (Luka 6:45) Chawiy lel, sal usu wa pakampwil wa kuyiladikij antu inay awonsu, kuyinkish dipaper dia diladikij dia Chivurikish diachapinau mulong wa kuyivurish. Chakwel kangal kumuvuramen muntu, antu avud amen anch chidi cha ukwash kulam dipang dia antu atazukinau chisu ni chisu ku Chivurikish, kuwejinaku antu asu ku muvu. Kwirijek mutapu winou ni kusal yawonsu tukutwisha mulong wa kuyiladikij antu asangaredina kukutwish kwikal mutapu uwamp wa kumekesh kujikitish kwetu kud Yehova Nzamb “mulong wa kupan kwend kujim kwakad kutwish kutadik.”—2 Kor. 9:15.
4. Yom ik yikutwisha kutukwash kuwejinaku kwipan kwetu mu mudimu pa Rish ni Ndol?
4 Kuwejinaku Kwipan mu Mudimu: Ov, ukutwish kuwejinaku kwipan kwey mu mudimu mu Rish ni Ndol? Kupakish kwikasikesh kuyilej antu akwau “katumb kawamp ka uyaj wa Kristu” kukwikal chakin nich chiyukish cha Nzamb. Yehova, chidiay Musul wa chimunyik chawonsu cha muspiritu, walonda anch: “Kutok kukez kumunyikin mu mididim.” (2 Kor. 4:4-6) Mud chiswiridikina, amakurump afanyidin kutenchik yikumangan ya mudimu wa chingand pa yisu yikwau ni jindond jikwau, kuyitakel chakwel kuyikwash in kulejan asotila kusal mudimu yisu yilemp. Akutwish kuwejinaku mudimu wa mu mukombil pamanch nakash ap yitenchik ya kusadil mu teritwar wa winsak ni uman wa ku telefon pa kupwa kwa midi ap urel nakash. Mud ukwash wa kuwejin kwipan kwey mu mudimu, tek rutong risikena ra asaa, ni sal usu wa kuriwanyish. Kud avud, kumwinkish Yehova yikwetau ya usey nakash atekinamu kusal uchibol nkwash.—Kol. 3:23, 24.
5. Amwing isakidin mutapu ik kukepish kwa asaa itinau mulong wa uchibol nkwash?
5 Ov, Ukutwish Kwikal Chibol Nkwash? Pasut kal mivu sambwad kudiosh kwakepishinau asaa itinau mulong wa uchibol nkwash. Kuswimp kwinoku kwayitwishishin avud nakash kuman yiyukish ya mudimu wa uchibol nkwash. Ov, wa upakishin kal? Amwing akwatin chaku cha kusal mwamu muvu ni muvu. Mu yikumangen yivud in kulejan avud akwatin mulad wa mudimu winou pamwing, ni wikadil kal masamun majim ma mujikit wa chikumangen mu muvu. Ov, ukutwish kusal program wa ngond muwamp wa kusal uchibol nkwash pa chirung cha Chivurikish? Ndol ukutwish kwikal pakampwil ngond muwamp kud amwing, mulong ukwet nsudiel ja mbing jitan ja kabuj.
6. Yitenchik ik yikasikeshina yasadikinaku?
6 Ov, chikumangen chen chidi pa program wa kuchendil kudiay kalam wa munyimuku chisu cha Rish ap Ndol? Chiyukish chikwau chikutwish kwikalaku mulong wenen. Mud mwijikishau kurutu, mu muvu wa mudimu wa 2006, awonsu asadila mud ayibol ankwash mwi ngond wezinay kalam wa munyimuku kuyendil akuyitazuk kukumangan ku chikunku cha kusambish cha chikumangan chisadikina nau ayibol mu rubing ra kwendil kwa kalam. Chakin kamu rusangu ra kukasikesh muspiritu ripaninau ku chikumangan chinech rikuyikwash ayibol ankwash avud kushiken kwikal ayibol a rawonsu. Chikwau kand, mu Rish tukwikal nich musangar wa kuyikwash antu kwez ku kutok kwa muspiritu kusutil ku dilejan dia buku musu Chom ik Chakin Kamu Chifundishinay Bibil? Mulong wak kulik kwitekin rutong ra kusambish dilejan dia Bibil mu buku musu?
7, 8. (a) Yom ik yikutwisha kutukwash kusal program wa uchibol nkwash? (b) Kwovijan kwa dijuku kukwashin mutapu ik, ni dijuku dia kabuj ditanidinamu nchik?
7 Piushinshikidina asaa 50 itinau mulong wa uchibol nkwash, tond program ik ukukutwishisha kumunyik kutok kwa uyakin piswimp asaa 12 rubing ni rubing. Ambamb nau antu atwishina kusal mwamu, pamwing ni antu akwau. Chinech chikutwish kuyikasikesh kwinung ney. Nich kwirijek kuwamp, in kulejan ansand ni amakurump abatishau kal, amana anch chadingap chikasikena nakash kuwanyish rutong riner ra usey. Lembil pa mulong winou. Kupwa, anch chiswapel, itenchika, ni pakish uchibol nkwash!—Mal. 3:10.
8 Majuku mavud mamen anch ukwash wa dijuku diawonsu ukutwish kukwash antu amwing mu dijuku kuwanyish rutong riner. Dijuku dimwing diakwata mupak anch yid ya dijuku yawonsu yitan yabatishau kal yikutwish kusal mud ayibol ankwash. An akwau aad adinga akad kubatishau asala usu wa pakampwil wa kutandurish mudimu wau. Mutapu ik wataninamu dijuku dined ku kusal usu wiwejidinaku? Afunda anch: “Wadinga ngond wa musangar, ni twiyova kamu anch moj ya dijuku yakasikana nakash. Twamujikitisha Yehova mulong wa chiyukish chishimokishina!”
9. Mutapu ik tukutwisha kumunyik kutok kwetu mu chirung chinech cha Chivurikish?
9 Ov, mujikit wetu wa pakampwil mu Rish ni Ndol ukumekesh kwikal ukasikeshina, utusejishina piswimp ni Tatukwetu wa mwiur? Nakash kutwish kwetu kwimedin pa usu wa pakampwil tusadila mulong wa kuwejin rukat retu mulong wa Nzamb ni Mwanend ni kuwej kwipan kwetu mu mudimu. Mupak wetu wikala amboku mud wa mwin kuseng, wawanga anch: “Am nikamujikitish [Yehova] nakash ni mukan mwam, inge nikamushiman mukach mwa runtu.” (Kus. 109:30) Yehova ukuyukish mujikit wetu wa mushiku chirung chinech cha Chivurikish. Mwamu tumunyikany amboku kutok kujim chakwel antu avud atwisha kudiokal ku mididim ni “kwikal ni kutok kwa mwom.”—Yohan 8:12.
[Caption on page 1]
[Study Questions]