Ov, Ukat Kwipul Mulong wa Antu a Chijiken?

Anch ukat kwilej Bibil ni muntu, ov, ukutwishap kumwipul anch ukwet murund nend, mwanamakwend, ap muntu wa chijiken ukutwisha niyend kukatish kwilej Bibil? Chisu ni chisu mwin kwilej ukutwish kujimbul antu avud. Anch mwin kwilej wakwinkish mbil, ukutwish kujimbul dijin dia muntu wilejina nend chisu uyila ni kuyital antu mulong wa kuyit kwilej nau Bibil. Ukutwish walond anch, “[Dijin dia mwin kwilej] wakatin kwilej Bibil, ni watongin anch niyey ukutwish wakat kutaninamu ku program wetu wa kwilej Bibil pakad kufut.” Kupwa lejan mu wiswimp mutapu ukatau kutakel dilejan, sadil buku Chifundishinay Bibil.

Anch wilejin ni muntu uyila nawamp kurutu, ukutwish wamukasikesh kurumburil ditenchik dia kwilej kud arund nend ni in mu dijuku diend akutwisha kusanger. Ukutwish wayitazuk chisu chilejinay. Ap anch chifanyidinap, ukutwish warijek chakwel ey weza ni kuyital mulong wa kuyilej mutapu wa kwilej. Kusal mwamu kukutwish kumukasikesh mwin kwilej kusambish kuyilej akwau yilejinay mu Bibil.

Antu ukata kuya ni kutal chisu ni chisu akutwish niyau kukujimbwil antu akwau, ap anch ayinau kand kal itiyija kwilej Bibil pakad kujing. Chisu uyinkishina buku Chifundishinay Bibil, ukutwish kamu wipul anch: “Ov, wijap muntu mukwau ukutwisha kutambul buku winou nich musangar?”

Mulong wa kuswapej kwa chirung chinech, tusotil kusadil mutapu win wawonsu udiaku mulong wa kuyikwash antu kutesh ni kwitiyij rusangu ruwamp. Ov, ukat kwipul mulong wa antu a chijiken?