Mujikit Wetu—Udi Mudimu wa Riy
1 Yesu wayimana yisak ya antu atesha uruu wend anch ading “kutambitamb ni kupalangan mudi amikoku akad kafung.” (Mat. 9:36) Yesu wayifundisha yijil ya Yehova nich ranaken ni rukat, chawiy nich riy chayongojay, ni wayiwanyishina maswir mau ma muspiritu. Anch twatongijokin pa mitapu yasadilay, tukat kwilej kutong ni kwov mud Yesu, ni ngikadil yend ya riy yikumekan patok mu mujikit wetu.
2 Itekina bil chisu cha kutongijokin pa mutapu wasalay Yesu chisu chezau antu adinga akad ruchingej ni ukwash kud ndiy. (Luka 5:12, 13; 8:43-48) Ndiy wayanakena antu adinga nich maswir ma pakampwil. (Marko 7:31-35) Ndiy wadinga ni kujingunin yovil ya antu akwau ni wayibangina. Kimenap ching pa yom yimekena ku mes. (Luka 7:36-40) Chakin kamu, Yesu wamekesha mu mutapu uwanyidina riy rikash ra Nzamb wetu.
3 “Wayovila riy”: Yesu kasalap mudimu wend mulong wafanyidina kuusal. ‘Wayovila antu riy.’ (Marko 6:34) Chawiy chimwing nlel, tusadinap ching kusu mudimu wa kulejan uruu, pakwez tukat kupakish kukol mwom wa antu wa usey. Tufanyidin kwijik mulong wak antu akwil mwamu. Ov, mulong wak wiyakamishinau ni unenganenau? Ov, ayidiburila ni kuyidimb kud atufung a relijon wa makasu? Kuyisanger kwetu kwakin antu akwau kukutwish kuyibachik ku kutesh rusangu ruwamp.—2 Kor. 6:4, 6.
4 Riy rikat kukwat ku michim. Chilakej: Mband umwing wanenganana nakash pafay mwanend mband wa angond asatu. Pezau amband aad Atuman kwol kwend, wayandjika mu chikumbu chend nich chitongijok cha kutadik yitongijok yau piur pa diyingish dilikidilay Nzamb mar. Pakwez, mband winou walonda anch: “Antesha nich riy ripandakena, ni chisu chayau, nova nawamp nakash chawiy lel nitiyija anch eza kand kakwau.” Ov, ukat kusal usu wa kumumekeshin riy muntu ni muntu utanina mu mudimu?
5 Kukudish riy kukez kutukwash kuyongoj chakin kamu antu akwau. Mu kukudish riy tukat kumushiman “Tatuku wa riy,” Yehova.—2 Kor. 1:3.