Ikalany ‘in Kwanakenijan ni in Kulikishijadin’
1. Ov, chom ik chiswiridina antu nakash nlel unou?
1 Mu rusangu ra antu kandikal mwikalap antu avud aswiridina nakash ukwash wa riy mudi winou. Mikadil yiyimp yidia mu mangand yipalangeshining kuburen musangar, runeng, ni kuburen ruchingej. Mamiliyon ma antu maswiridin ukwash, ni chitudia in Kristu, tudi mu mwikadil umwing tufanyidina kumekesh anch tukat kuyibangin amutej netu. (Mat. 22:39; Gal. 6:10) Ov, mutapu ik ukutwisha kumekan kubangin mudi kwinoku?
2. Ov, yisu njil yipandakena kuwap kudi etu ya kumekeshin riy?
2 Mudimu wa Riy: Kwikil rongoj rakin ni ra chikupu rakad kudiokil kudiay nzamb. (2 Kor. 1:3, 4) Yehova utukasikeshin chakwel tumwimburija kusutil ku kwikal ‘in muchim wa riy,’ ni ndiy utwinkishin mudimu wa kuyendil amutej netu nich rusangu ruwamp ra Want. (1 Pita. 3:8) Kwipan kukash mu mudimu winou udi mutapu upandakena kuwap kudi etu chakwel tupana rongoj kudi antu “akweta michim ya runeng,” mulong Want wa Nzamb udi ching kusu ruchingej rakin ra antu amena mar. (Isay 61:1) Mulong wa riy rend kudi antu, Yehova ukez piswimp ap kudiosh uyimp ni kutek mangand masu matentamina.—2 Pita. 3:13.
3. Ov, mutapu ik tukutwisha kuman antu mudi mwasalay Yesu?
3 Kuyiman Antu Mudi Mwayimanay Yesu: Ap palejanangay kudi yisak yijim ya antu, Yesu kadingap ni kuyitongijokin antu mudi chisak kusu. Ndiy wamananga maswir ma muspiritu ma muntu ni muntu. Ading mudi amikoku akad ni kafung wa kuyitakel. Muchim wa Yesu wakwachika nich yom yamanay, ni washikena ku kuyilej nich kushimpish muchim. (Mar. 6:34) Kuman kwetu kwa antu mu mutapu umwing wayimanay Yesu ku kutukasikesh chakwel tumekesh ranaken rakin kudi muntu ni muntu. Chinech chikumekan mu mutapu wetu wa kulond ni mutapu tutadila. Mudimu wa kulejan ufanyidin kwikal pa ndond ya kusambish, ni tufanyidin kurijek mazu metu mu mutapu uwanyidina chakwel twisambina pa milong ya mwom ya muntu ni muntu.—1 Kor. 9:19-23.
4. Ov, mulong wak tufanyidina kwikal ni riy?
4 Chisak chijim cha antu adiokidila ku michid yawonsu chitiyijin uruw wa Want pakad kwidjidjek ni chikasikeshining yisakin yimekeninga mudiau. Anch ayinetu twadandamen kwikal ni riy, tukez kumulimish ni kumusangaresh Nzamb wetu wa riy Yehova.—Kol. 3:12.