Kudish Ranaken Mulong wa ‘Antu a Mitapu Yawonsu’
YESU payifundishay in kwilejend mutapu wa kulejan rusangu ruwamp, wayibabesha anch antu awonsu kakukatap kuyitesh. (Luka 10:3, 5, 6) Chom chinech chikat kushiken kand mu mudimu wetu wa kulejan. Antu amwing tukata kutanijan nau akutwish kutuswingish ap kututendish. Anch asal mutapu winou, chikutwish kutukasiken kwikal ni ranaken ni kukat kand kuyilej rusangu ruwamp.
Muntu ukweta ranaken ukat kuman maswir ni milong ya antu akwau, ukat kuyovil riy ni kukimb kuyikwash. Pakwez yom ik yikutwisha kushiken anch twashadish ranaken mulong wa antu tusankena mu mudimu wetu wa kulejan? Tukushadish mushiku, kwawiy kulond anch, tukutwishap kand kwikal tayad mulong wa kuyilej ni tukukatap kand kuyikwash. Tukutwish kufanakesh mushiku wetu ni kasu. Chakwel anch kasu kazuta nakash, chitin rinkind mwin kukapep. Chilik chimwing, mulong mushiku wetu wikala ukash, tufanyidin kwikal ni ranaken!—1 Tesalonik 5:19.
Mutapu ik tukutwisha kwilej kwikal in ranaken, ap anch chikasiken? El twisambinany yilakej yisatu tukutwisha kwimburij: Yehova, Yesu ni kambuy Paul.
IMBURIJ RANAKEN RA YEHOVA
Mu tunan twa mivu, antu akat kulond makasu mayimp piur pa Yehova. Pakwez udandamedin kumekesh “kuwap kwend kudi antu akad kumujikitish, ni kudi antu ayimp.” (Luka 6:35) Mutapu ik umekeshinay kuwap kwend? Ushimpishin muchim kudi muntu mwawonsu. Yehova ukatin anch ‘antu a mitapu yawonsu’ apanda. (1 Timote 2:3, 4) Ap anch ukisin uyimp, antu adi a usey kudi ndiy ni kakatinap muntu ap umwing afa.—2 Pita 3:9.
Yehova wij anch Satan ukwet ukaliweny mu kuyidimb antu chakwel itiy makasu. (2 Korint 4:3, 4) Antu avud ayifundisha makasu piur pa Nzamb kudiosh ku wanikanch wau. Chawiy mutapu ukatau kutong ni kwiyov ukutwish kusal anch chiyikasikena kwitiy uyakin. Pakwez Yehova udi tayad mulong wa kuyikwash. Mutapu ik twija mwamu?
Chilakej, tal mutapu wiyovay Yehova piur pa antu ading mu musumb wa Ninive. Ap anch ading in chisum, Yehova wamuleja Yona anch: ‘Chad niyam, ov, nifanyidinap kwovil riy Ninive musumb ujim, mudia antu 120 000 ni kusut akad kwijik kushalijan kudia pakach pa uwamp ni uyimp?’ (Yona 4:11) Yehova wayovila antu inay riy, ading akad kwijik uyakin piur pend. Chawiy wamutuma Yona mulong wa kuyibabesh.
Tukat kwiyov mutapu umwing mudi mwiyovay Yehova mulong wa antu. Antu adi a usey nakash. Mudi Yehova, tudi niyetu tayad mulong wa kuyikwash kwilej piur pend ap anch chimeken anch kakwitiyap uyakin.
IMBURIJ RANAKEN RA YESU
Mudi Tatukwend, Yesu niyend wayovila antu riy “mulong awiy ading aziyin ni kujilijil mudi amikoku akad kafung.” (Mateu 9:36) Yesu wijika mulong wak antu inay ading mutapu winou. Chading mulong antakel au a chirelijon ayisadinang nayimp ni kuyifundish makasu. Ni ap anch Yesu wading wij anch antu avud adia pakach pa antu ezina kumutesh kakwikalap in kwilejend mulong wa mayingishin kushalijan, ndiy wadandamena kuyifundish yom yivud.—Marko 4:1-9.
Anch antu akul nayimp ku uruu wetu, tufanyidin kusal usu wa kwijik mulong wak usadinau mwamu. Pamwing ap akwet chitongijok chiyimp piur pa Bibil ap piur pa in Kristu mulong amana antu amwing itazukina ayinau anch in Kristu akat kusal yom yiyimp. Akwau atesha makasu piur pa yom twitiyijina. Akwau kand akutwish kwov wom anch anamakwau ap antu akwau akuyisip anch apakish kwisamb niyetu.
Antu amwing tusankena ikala pamwing ap ni yishiken kampand yikash yayinenganesha nakash. Mishoner umwing utazukinau anch Kim ulondin anch antu avud a mu teritwar wend apanda kwi njit ni ashadisha yom yivud yadingau nich. Kakwetap kand ruchingej rakin mulong wa machuku ma kurutu. Akwet ujim nakash ni kamuchingejidinap muntu ap umwing. Antu adia mu teritwar winou yisu yivud akat kuyikangesh Atuman kulejan. Chisu chimwing nambaz Kim amurishikisha padingay mu mudimu wa kulejan.
Mutapu ik wadandamenay Kim kwikal mwin ranaken, ap anch antu amusadina nayimp? Wasalang usu wa kuvurik chisu chawonsu Jinswir 19:11, ulondina anch: “Manangu makat kukepish ujim wa muntu.” Pakatay kutong piur pa yom yayishikena antu a mu teritwar wend, chinech chikat kumukwash kuyovil ranaken. Ni antu amwing akatay kusankan ading awamp. Mu teritwar winou, mudi antu amwing awamp akatay kuchirikin.
Tukutwish kwiyipul anch: ‘Anch nijap uyakin, mutapu ik nikutwisha kusal anch Atuman a Yehova ez mulong wa kwinlej?’ Chilakej, chikwikal nchik anch twatesha kal makasu piur pa Atuman? Pamwing ap niyetu tukutwish kwakul mutapu uyimp ni tukukat kutusadin nich ranaken. Yesu walonda anch tufanyidin kuyisadin antu akwau mu mutapu tukatina anch atusadina niyetu. Chawiy tufanyidin kusal usu wa kwijik mutapu wovilau antu akwau ni kuyishimpishin muchim, ap anch chikasiken kusal mwamu.—Mateu 7:12.
IMBURIJ RANAKEN RA PAUL
Kambuy Paul wamekesha ranaken ap kudi antu akulang ni chisum mu mudimu wend wa kulejan. Mulong wak? Mulong wavurika mutapu wadingay niyend. Walonda anch: ‘Pakur nading mwin kusaalan ni mwin kuzengol ni mwin chibeng. Pakwez angovila riy mulong nasalang pakad kwijik ni nadingap ni ritiy.’ (1 Timote 1:13) Paul wading wij anch Yehova ni Yesu amwovila riy. Wafanyina kuyitesh antu akimbang kumukangesh kulejan, mulong niyend wasalang mwamu.
Yisu yimwing, Paul wasankanijana nau antu ading ni yitiyij yikash ya mafundish ma makasu. Mutapu ik yamwovisha? Tutangin mu Midimu 17:16 anch chisu chadingay mu musumb wa Aten, “muchim wend wanenganana nakash mulong wamana musumb wawonsu wizwil sens nich yirumbidij ya akish.” Chawiy, Paul wasadina yom yamujimesha mudi mutapu wa kuyifundish nich antu. (Midimu 17:22, 23) Watenchika mutapu wend wa kulejan ni wambamba nau antu mu mutapu kushalijan adiokila ku jindond kushalijan chakwel “[ayipandishap] amwing ku midimu [yend] ya mitapu yawonsu.”—1 Korint 9:20-23.
Anch tuyilejin antu akwila nayimp ap akweta yitiyij yiyimp, tukutwish kusal mudi mwasalay Paul. Tukutwish kusadin yom twija piur pa awiy mulong wa kuyikwash kwilej piur pa ‘rusangu ruwamp ra chom chiwamp nakash.’ (Isay 52:7) Nambaz utazukinau anch Dorothy ulondin anch: “Mu teritwar wam, antu avud ileja anch Nzamb udi mwin chisum ni mwin kurumburish muyimp. Nayijikitishang antu mulong wa yitiyij yau yikash yadingau nich mudiay Nzamb ni napwitinang manangu mau pa yom yilondinay Bibil piur pa wuntu wa rukat wa Yehova ni kushilamu kwend mulong wa machuku ma kurutu.”
‘DANDAMEN KUPANDAKAN UYIMP NICH UWAMP’
Mulong tusejin piswimp ni disudiel, tukutwish kuchingejin anch yaku ya antu amwing yikupandakan “kuya kurutu nakash mu kuyip.” (2 Timote 3:1, 13) Pakwez tufanyidinap kushadish ranaken ap musangar wetu mulong wa mutapu wakwilau antu. Yehova ukutwish kutukasikesh chakwel ‘tudandamena kupandakan uyimp nich uwamp.’ (Rom 12:21) Nambaz chibol utazukinau anch Jessica ulondin anch ukat kusankanijan nau antu akweta chibud ni akata kutusip etu ni uruu wetu. Ulondin kand anch: “chinech chikutwish kuziyishan. Anch nasambish mambamb, nikat kumulembil Yehova mu kayau-yau ni kumwit ukwash wend mulong wa kuyiman antu mudi muyimenay ndiy.” Chinech chimukwashin Jessica kushinshikin pa mutapu wa kuyikwash antu pa ndond pa kushinshikin pa yovil yend.
Tufanyidin kand kusal usu wa kuyikasikesh akadivar nau anambaz netu chisu tulejena nau pamwing. Jessica ulondin anch ang udi mu mudimu wa kulejan nau antu akwau ni anch umwing wau ukwet chom chiyimp chamushikena, ukat kusal usu wa kulik kushinshikin pa chom chinech. Pakwez, ukat kwisambin piur pa chom chiwamp, mudi yibudikin yiwamp ya mudimu wa kulejan ap anch antu akat kwakul nayimp.
Yehova wij nawamp anch yisu yimwing chitukasikedining kulejan. Pakwez ukat kusangar nakash anch twimburij riy rend! (Luka 6:36) Chakin kamu, Yehova kakudandamenap kwikal mwin ranaken ni mwin kushimpish muchim mulong wa antu adia mu mangand minam chikupu. Tukutwish kwikal nich kashinsh anch wij nawamp chisu chikuletay disudiel. Kushik ni katat, mudimu wetu wa kulejan udi wa kuswapej. (2 Timote 4:2) Chawiy el tudandamenany kulejan nich mushiku ni kwikal nich ranaken rakin mulong wa ‘antu a mitapu yawonsu.’