Mwilikeja Mulej Mujim Piusadidina Buku Chifundishinay Bibil
1. Mutapu ik wadingay ni kufundish Yesu?
1 Yesu, Mulej Mujim, wading ni kurumburil yom mu mutapu uswapela, udia zwang. Chakwel kuyitongish antu adinga ni kumutesh, ndiy wadinga ni kuyipul yipul yisu yimwing chakwel apana yitongijok yau. (Mat. 17:24-27) Ndiy wapwitina manangu mau pa Dizu dia Nzamb. (Mat. 26:31; Mako 7:6) Wipuka kulondol yom yivud nakash, mulong wading wij anch akudandamen kwilej. (Yohan 16:12) Yesu wading ukat kuyibangin in kwilej end anch ading ni kwitiyij ni kutesh yom yadingay kuyifundish. (Mat. 13:51) Buku Chifundishinay Bibil amusadil mulong wa kutukwash kufundish mudi mwafundishangay.
2. Mutapu ik tukutwisha kusadil yipul ya kusambish ya shapitre ni shapitre?
2 Yipul ya Kusambish: Piusambishina shapitre, chiwapin kupwitin yitongijok pa yipul yidia mwishin mwa mutu wa mulong. Ipul yipul yiney pakad kuchingejin yakul mulong wa kukudish maku ma mwin kwilej. Ukutwish ap kumwit kurumburil yipul mu wiswimp. Chifanyidinap kwisambin nakash yirumburil yend ka chom pa ka chom ap kutadik yawonsu yilondilay anch yidi ya makasu. Ukutwish kusu kumujikitish mulong wa yitongijok yend ni kusambish kushinshikin malejan. Mutapu wend wa kwakul ku yipul ya kusambish ukez kakukwash kwijik anch uswiridin kupwitin manangu mend pa chikunku kampand cha dilejan.
3. Mutapu ik tukutwisha kwikadish dilejan dia Bibil diswapela?
3 Maverse ma Bibil: Dilejan difanyidin kwimen pa Bibil. (Heb. 4:12) Pakwez, chifanyidinap kutang maverse mawonsu majimbwilau. Kasikeshin maverse pimedina yitiyij yetu. Chifanyidinap kutang maverse malejena jinsangu piur pa chafundinau. Buku Chifundishinay Bibil urumburil uyakin mu mutapu uswapela. Sal anch dilejan dikala diswapela. Shinshikin manans majim, ni ipuk kulond yom yivud pa yom yikemp-yikemp ap kudiokal mu malejan ma buku ni kusambish kwisambin yom yakad usey.
4. Chom ik chikumekesha anch tufanyidin kwitekin chisu cha kwisambin ap bwat jinsangu jidia mu wenjil chisu cha dilejan?
4 Wenjil: Mu wenjil mudi mitu ya milong 14 yiwejidinau ku manans majim. Ukutwish kwisambin mitu ya milong yiney chisu cha dilejan ap bwat. Piur pa mitu ya milong yimwing, ukutwish kumukasikesh muntu wilejina nend Bibil kutang amwinend malejan makwau, anch uteshin ni witiyijin jinsangu jidia mu manans majim. Chilakej, anch mwin kwilej witiyijin kal anch Yesu udi Mesia, chidiap cha usey kwisambin nend mutu wa mulong “Yesu Kristu—Mesia Washilaumu,” piwisambidina shapitre wa 4, “Yesu Kristu Udi Nany?” Chisu chikwau, chikutwish kwikal cha ukwash kwitekin chisu cha kwisambin malejan madia mu wenjil piwilejinanya ap chikunku chinech.
5. Anch watond kushinshikin jinsangu jidia mu wenjil, mutapu ik ukutwisha kusal?
5 Anch watond kwisambin malejan madia mu wenjil, ukutwish kurijek kurutu kwa saa yipul ni kushinshikin maparagraf pamwing ni mwin kwilej mudi ukutwisha kushinshikin pamwing nend malejan min kamu ma kwilej. Ap, kwambatan nich maswir ma mwin kwilej, ukutwish kusadil minit yikemp mulong wa kuchirikin nend malejan. Kusal mwamu kukez kakukwash kwikal nich kashinsh anch mwin kwilej uteshin malejan makatay kutang amwinend.
6. Mutapu ik ufanyidina kusadil mushet wa dichirikin kwisudiel kwa dilejan ni dilejan?
6 Mushet wa Dichirikin: Mushet udia kwisudiel kwa shapitre ni shapitre uletin mazu makata kwakul ku yipul ya kusambish. Ukutwish kusadil mazu minam ni kuchirikin manans majim ma shapitre. In kwilej amwing amana anch chidi cha ukwash kutang tumaparagraf ni kutang maverse ma Bibil pamwing ni mwin kwilej. Kupwa mwipula mwin kwilej chakwel arumburil mu wiswimp mutapu umekeshina maverse ma Bibil ukinakin wa mazu. Yiney yimukwashin mulej kwijik anch mwin kwilej uteshin nawamp manans majim ma difundish ni mutapu umakasikeshidinau nich Bibil ni anch umitiyijin. Yimufundishin kand mwin kwilej kusadil Bibil ni kuyilej antu akwau uyakin.
7. Mutapu ik tukutwisha kusadil buku Chifundishinay Bibil chakwel kuwanyish mudimu wetu?
7 Mutapu upandakena kuwap wa kuwanyish mudimu wetu wa kuyilej antu ni kwikadish in kwilej udi kwilikej mitapu ya kufundish ya Yesu. (Mat. 28:19, 20) Buku Chifundishinay Bibil ukutwish kutukwash kusal mwamu. Sadil nawamp buku winou chakwel kuyifundish antu akwau uyakin mu mutapu udia zwang, upipela, ni usangareshina.