Sadilany Nawamp Mitu ya Milong Yidia mu Buku Chom Ik Chakin Kamu Chifundishinay Bibil

Pilejinay mwin Kwilej Bibil yifundishinay chakin kamu Bibil ni kusadil yilejinay, ukukul ni kukun mabuj ma muspiritu. (Kus. 1:1-3) Tukutwish kuyikwash in kwilej etu chakwel aya kurutu anch twasadil nawamp mitu ya milong yidia mu buku Chom Ik Chakin Kamu Chifundishinay Bibil.

Yipul ya Kwinsambishil: Shapitre ni shapitre usambishin nich yipul yakwilau mu dilejan. Ukutwish kwipul yipul yiney kwinsambishil pakad kuchingejin kwakul chakwel mwin kwilej asangera mambamb malondwilaku. Ap ukutwish kumwit chakwel arumburila mu wiswimp chipul ni chipul. Anch kakwilap nawamp, chifanyidinap kumulej anch warumbuk kal. Yakul yend yikukukwash chakwel ujingunina dinans ik ufanyidina kutongin ni kushinshikin.​—Jinsw. 16:23; 18:13.

Wenjil: Anch mwin kwilej uteshin nawamp ni witiyijin yom yilejinay, ukutwish kumukasikesh kusu chakwel achirikina amwinend malejan madia mu wenjil. Kurutu kwa kusambish dilejan dikwau, ufanyidin kusadil chisu chikemp chakwel wikala nich kashinsh anch uteshin kamu nawamp. Anch chidi cha usey, ukutwish kwitekin chisu piukata kwilej nend mulong wa kwisambin pa malejan madia mu wenjil ap kutang maparagraf ni kwipul yipul watenchika kurutu.

Mushet wa Yipul ya Kuchirikin: Mushet wa Yipul ya Kuchirikin udia kwinsudiel kwa shapitre ni shapitre ukwet mazu makwila ku yipul yidia kwinsambishil kwa shapitre ni shapitre. Ukutwish kusadil nawamp mazu minam mulong wa kwikal nich kashinsh anch mwin kwilej wey uteshin nawamp ni ukutwish kumurumburil manans majim. Tang mazu minam nich dizu dia piur ni maverse mawonsu malondwilaku. Kupwa, muleja mwin kwilej wey chakwel asadila maverse minam chakwel alejana anch mazu minam madi makin.​—Mid. 17:2, 3.